[5. Mai 1605] Ad diem 5. Maii anno MDCV inclyti medici collegii nostri dominis doctoribus, transmisi libelum supplicem, Michaelis Schlögl Balneatoris, petentis; siquidem viduam pie defuncti Balneatoris in Röhrnpadt in uxorem, duxisset ad solitum balneatorum examen admitti: consensit facultas, ut factis faciendis et praestitis praestandis examinaretur, quod die 13. mensis Mai, cum idem balneator mihi decano in praesentia dominorum examinatorum, D. D. Joannis Bittneri, Dominici Piselli, Isaac Panisot et Conradi Colmanni ad solitum balneatorum examen per tres artis suae magistros praesentatus fuisset, literas etiam nativitatis et disciplinae nobis exhibuisset, factum est, respondit utcunque, confecit emplastrum diachilon, et unguentum fuscum, praestitit juramentum solitum, admissus et approbatus, datumque illi examinis testimonium est, solvit facultati 3 flor., pedello suum. Eodem quinto Mai die libelum supplicem Benedicti Nägele, Balnei ad S. Dorotheam, ut et Schölcken padt olim magistri, licentiam sibi fieri petentis, utut certum pro tempore in vel extra civitatem locum seu balneum non habeat, chyrurgicam tamen suam operationem in suburbiis civitatis citra reliquorum balneatorum impedimentum,

omnibus libere praestare queat, dominis doctoribus facultatis transmisi. Quod, cum in notabile caeterorum Balneatorum praejudicium cederet, absque Viennensis senatus concessione permittere in facultatis potestate non esset, denegatum illi, simulque responsum fuit, hoc non tam ad facultatem quam senatum civitatis spectare. Posse itaque eum ibi suam proponere causam.

Iunius: