[4. Juni 1636] Examen in 4. Juni delatum et bene peractum fuit praesentibus doctoribus Colmanno, Mannagetta, Häringshauser, Millero pharmacopoeis Bartholomaeo Schlezzero et Volckmaro Tillo.

Institit iterum pro assignatione puncti D. Daniel Ketzer promittendo loco scriptorum promotionis et nativitatis suae testimoniorum quae ob bellorum tempestatem habere non poterat se a viris fide dignis testimonia viva producturum. Acquievit facultas.

Cum noster libellus contra Raigerum ab excelso regimine haberi non potuerit visum fuit memoriali quodam illud ad dandam informationem monendum esse. Sed cum caesaris discessus ad conventum electoralem Ratisbonensem jam promulgatus esset serenissimus archidux gubernator istarum provinciarum constitutus esset placuit negotium ad caesaris [fol. 165r] abitum deferre et quidem nostro maximo bono nam archiduci gubernare incipienti tradidi nomine facultatis 13. Junii libellum, in quo repetii quae a caesaro petita sunt nimirum ut Raiger donec orthodoxae fidei se conformem reddiderit ab omni praxi medica arceatur sub poena relegationis simulque ut melius agnoscatur quam periculosa sit tam catholicis tam Lutheranis ejus praxis dominum officialem et confessarios consulendos rogavi et statim ad hanc primam instantiam clementissimum hoc jurisconsultum obtinui: