[6. März 1646] I. congregatio 6. Martii. Lectus fuit libellus supplex Wolfgangi Vederle civis Egrani quem aulicae camerae exhibuerat ab eadem petentis ut sibi soli vigore privilegiorum anno 1638 concessorum detur facultas in Austriam acidulas egranas invehendi; Petro Ham vero concivi et alteri cuidam Egrano tanquam ignaro artis aquas dictas hauriendi apportatio et venditio acidularum inhibeatur. Haec petitio sequentem habuit censuram: Dominus Vederle ante aliquot annos et obtentum privilegium promisit non solum fideliter et opportuno tempore se acidulas hausturum et convenientibus vasis (ne spiritus minerales iis apertis porosis aut hiantibus exhalare possent) occlusurum sed etiam in sufficienti copia et pretio tolerabili Viennam se transmissurum.

Harum conditionum hactenus nullam servasse Egrae fere nunquam habitasse sed hauriendi curam aurigae reliquisse qui vasa non tantum porosa et illota adhibuit vel acidulas turbidas hausit aut carbonibus lignis aliisque sordibus infectas Ratisbonam transmisit ibique in litore et ardore solis quandoque per tres septimanas et ultro reliquit huc ad sufficientiam nunquam misit neque defectum per alios adimpleri passus est pretio denique satis magno vendidit et in salutari Dei dono ex iniquo monopolio multorum sanitatem et vitam in periculum adduxit. . Petrum vero Ham ab ipso Vederle insolenti calamo contumeliose habitum testimonio doctorum Monacensium et ipsius serenissimi electoris Bavari commendatione probatum non tantum Monachium sed etiam huc Viennam meliores et efficaciores acidulas attulisse pretio insuper multo leviori hactenus vendidisse. Ideoque injustum acidularum monopolium penitus abolendum et ad excitandam advehentium aemulationem omnibus indifferenter earundem

importationem esse concedendam. Hujusmodi informatio Vederle a quopiam revelata displicuit quocirca nihil apud cameram ursit sed privata religiosi affinis et quorundam medicorum opera usus in aula posthabitis ordinariis approbationibus nec in minimo emendatus privilegii sui confirmationem impetravit Linzii ceteris meliora inferentibus per id plurimum impeditis.

Doctores Joannes Marcus Wacker et Petrus Mayer ad consilia petierunt admitti. Admissi sunt salva tamen eorum proedria qui ante ipsos hic promoti sessionem nondum acceperant.

Statutum est demortui D. Leonhardi Milgiesseri relictam viduam per duos doctores [fol. 216r] esse requirendam ut revisis pie defuncti mariti scriptis si quae nostram facultatem concernerent ea remitteret per aliquem in ordinem redigenda et libro actorum inscribenda.

Supplicavit Christophorus Haas ex Oberalting Bavarus hoc tempore ordinum Austriae in Nova-Civitate chirurgus ut ad examen admitteretur. Cum aliqui assererent illum praeter balneatoriam chirurgiae disciplinam nunquam subiisse nunc autem authenticis documentis evinceret se post exantlatos balnei sudores etiam chirurgicam artem Nissae in Silesia sub Joannis Wagneri apud serenissimum Carolum archiducem chirurgi disciplina debito modo perdidicisse examinatus est 12. Aprilis antea praesentatus per chirurgorum tribunum Danielem Becker.