[13. Jänner 1687] I, congregatio 13. Januarii. D. Joannes Adamus Springenfels phil. et med. dr. petit pro sessione et admissus est. [fol. 63v]

Dom. Adrianus Jacobus Orus phil. et med. dr. supplicavit pro repetitione et assignatus fuit ipsi aphor. 23 sect. I.

Missum fuit decretum a regimine, ut facultas et balneatores civici dent informationem de fonte salutari (uti divulgebatur) dom. Nipho, quem dicit se habere in aedibus suis auf der Laimbgruben, asserendo, quod multae infirmitates istius fontis usu fuerint sanatae. Conclusit facultas dom. Nipho incumbere, ut per attestationes authenticas doceat effectus salubres fontis sui sicuti spargit. Secundo, per certos commissarios examinandum esse hunc fontem, quaenam in se contineat mineralia. Tertio, ulteriorem post haec faciendam esse experientiam, an et quibus affectibus conveniat donec fons salutaris vere dici possit. Interim dom. Nipho serio imponendum esse, ut usum hujus fontis et balnei suspendat, ne plures homines ex nimia erga eum fiducia decepti plus damni quam commodi sibi causent. Quarto, dom. Nipho fontem plus ob propriam commodum tantopere depraedicare quam habende curam ad salutem hominum.

Destillator quidam petiit licentiam affigendi schedas per plateas urbis pro venditione aquae cujusdam arthriticae, quam vocabat aquam Elisabethae reginae Hungariae sed absolute fuit ei denegatum.

D. Wisinger insinuavit facultati, quod velit instituere privatum collegium medicum in commodum med. stud. Approbavit facultas, cum apud dom. juristas idem fiat.

Legit sua acta D. Illmer et approbata sunt.