[19. August 1679] V. congregatio 19. Augusti. D. Daniel Müller pharmacopoeius ad nigrum morum supplicavit, quatenus dispensatio theriacae et Mithridatii sibi concederetur et annuit facultas.

Dri Blömer data fuit sessio.

Fuit propositum decretum regiminis ratione cujus ex mandato caesareo toti sanitatis negotio praeficiebar, cum singulari facultatis applausu, quo in gradu et civium et aliorum machinationes omnes facilius eludere et membra facultatis tueri poteram, quod etiam viriliter in actum deduxi.

Item aliud regiminis decretum propositum fuit, quo 4 medici, 4 chirurgi et 4 inspectores cum apothecariis petebantur, ita ut 4 juniores sub poena banni et exclusionis infectorum curas susciperent. Denominati fuerunt D. D. Linck, Furlan, Pachmayer et Blömer cum stipendio annuo 400 flor. a me persolvendorum, cum assignata habitatione et lignis. Hinc altero statim die cuivis 100 flor. dedi anticipate. [fol. 12v]

Novum item decretum nobis procuravi a regimine, quo facultati facultas dabatur omnes extrafacultistas et circumforaneos expellendi. Favorabile hoc decretum hic inseruissem sed ad perpetuam rei memoriam illud imprimi curavi, pro quo dedi 4 flor.

Aliud decretum regiminis produxi, quo jubebamur omnibus etiam infectis servire, summa nempe urgebat necessitas adeoque tacite revocabantur crudae istae factae inhibitiones, ne medici (quod servare impossibile erat, siquidem vix alii praeter pestem inveniebantur morbi) infectos accederent.

Conquestus fuit magister sanitatis, quod nimis crudelia et comminatoria reciperet a regimine decreta et per responsum in causa justa et favorabili omnis possibilis assistentia ipsi fuit promissa.