[22. Dezember 1708] Die 22. Decembris mane meo jussu rumorum militibus stipatus et a tergo sequentibus pedellus Valentinum Lasko publice duxit ad carceres academicos.

Eodem die instituitur examen praeliminare ratione enecatae oleariae et conclusum fuit: Oleariam pillulis Laskianis enecatam fuisse, modo etiam postea ex proba a D. Faber cum aliis dom. collegis in cane facta magis apparuit. Canis enim devoratis 2 pillulis varia et horrenda passus fuit symptomata et fere ipsam mortem.

Secundum propriam confessionem constabant hae pillulae ex opii unciis 2 semis, aloes, myrrhae, extracti croci ana drachmas 2, ex auro certo modo praeparato margaritis, corallis ana drachmam 1. Hisce pillulis multis annis omnes morbos curare voluit et cum suis asseclis pro panacea universali habuit plurimosque decepit. Dom. Joannes Josephus comes a Jörger27 partem hujus Laskonis defendens, sub ipso examine primum per suum cubicularium, deinde etiam in propria persona urgebat sibi ex arresto dimitti Laskium tanquam in suo servitio et salario existentem et ad nos in examine occupatos statim intrare voluit sed usque ad finem exspectare debuit. Interim examinatores hunc casum criminalem agnoverunt, quare non obstantibus clamoribus et injuriosis verbis comitis Jörger contrarium et ulterior arrestus concludebatur et pro formanda sententia consilium medicum sive casus in forma cum resolutione videbatur necessarius, qui pro more solito D. faber tanquam juniori committebatur et satis bene ab ipso descriptus et resolutus fuit.