[18. Juli 1709] Die 18. Julii examen uxoris et mariti, simul etiam ocularis inspectio instituta fuit et postquam omnes circumstantiae bene essent examinatae nec apud maritum in partibus genitalibus ullum conformationis vitium observari potuerit, conclusum, praedictum Josephum Kien pro frigido habendum, idque ex defectu boni sanguinis et spirituum, eo quod uxor ipsi quotidie graviter laboranti vilissima nec debite praeparata daret alimenta, illa vero nunquam cum ipso sed semper sola et privatim voraret, item in locis marito incognitis tam in quam extra domum cubaret, interim ille in continuis animi pathematibus, rixis, maerore [fol. 220r] et tristitia viveret, si vero sine hisce animi passionibus bonis posset frui alimentis et convenientia adhiberentur remedia, illum adhuc sufficientes ad consumandum matrimonium vires recuperare posse judicavimus et quidem ex hac ratione, quia confitebatur se ante has controversias et ante matrimonium in conversatione cum puellis statim sensisse erectionem virgae sed conclusum erat plane contra spem et opinionem uxoris, quae nihil aliud quam anihilationem matrimonii et alium maritum robustiorem desiderabat. A parocho, qui eos copulavit, videbatur hic erratum fuisse, quod hanc feminam circa ultimos gravidam menses cum hoc viro, quod alias fieri non solet copulaverit, maritus enim confitebatur, se ob magnitudinem ventris ab initio fuisse a coitu impeditum seseque tunc temporis sufficientem habuisse erectionem sed illam ob inde exortam confusionem et verecundiam, tandem etiam animorum in dies magis magisque defecisse, nec mirum, quia nec caballum homine multo robustiorem cum simili macilentia et exiguo alimento aliquid efficere potuisse credimus. Ex hoc disce componere pro assensu, si bona juscula comedere desideras.