Fridericus dei gracia sancte Salzburgensis Ecclesie Archiepiscopus. apostolice sedis legatus. Dilecto nostro in Christo Vlrico¹⁾ eiusdem Ecclesie Canonico. Curie sue magistro. salutem in domino. Et si omnium Ecclesiarum nostro regimini commissarum profectibus ex debito pastoralis officii teneamur intendere, decorem tamen domus dei, videlicet dicte Salzburgensis Ecclesie sponse nostre. cui defigendo manum apud deum fide media copulamur. tanto ardenciori zelo nos conuenit ordinare. quanto excellencius super omnes alias nostre Prouincie Ecclesias, velut magistra primatum obtinet, et ipsius honorabilis magnificencia filiarum gloria reputatur. Sane dudum prehabito diligenti tractatu cum dilectis in Christo. Chunrado²⁾ Preposito. Pilgrimo³⁾ Decano. et Capitulo nostro. de ipsorum consilio et consensu, dimidiam partem fructuum primi anni, omnium Ecclesiarum Parrochialium nostre dyocesis, ad nostram collacionem spectancium, aliter quam ex causa permutacionis vacancium, ad fabricam eiusdem nostre Metropolitane Ecclesie duximus reseruandam. Quia tamen nonnulli, quibus vacantes nobis Parrochiales Ecclesias postea contulimus, apud dictam nostram Metropolitanam Ecclesiam, a qua suarum promocionum stillicidia emanarunt, se reddentes ingratos, dictam porcionem, vel eius partem. vsque modo soluere neglexerunt. Deuocioni tue committimus et mandamus. quatenus eosdem, et alios, qui deinceps negligentes, aut rebelles se exhibuerint in premissis, ad dicte porcionis solucionem, dicte fabrice integraliter faciendam, per censuram ecelesiasticam. auctoritate nostra. arceas et compellas. Nos quoque sentencias, per te in rebelles canonice et racionabiliter promulgatas, ratas. et gratas habebimus, facientes eas auctore domino inuiolabiliter obseruari. Datum Salzburge VII. Kal. Junii Anno domini Millesimo, Trecentesimo. Tricesimo Quinto.

Source Fulltext: DOPPLER