C. In nomine sanctae et individue trinitatis. Arnolfus divina favente clementia rex. Si erga loca divino cultui mancipata curam gerimus eaque ex temporali profectus nostri commodo superni muneris largitate nobis collato accumulamus, non solum praedecessorum nostrorum scilicet regum morem decenter implemus, verum etiam regni nostri statum deifice roborandum perennique gaudio a deo salvatore exinde nos remunerandos esse oppido credimus. Quam ob rem cunctorum Christicolarum praesentium videlicet patescat ac futororum agnitioni, quoniam nos pro mercedis aeternae emolumento Diotmaro reverentissimo sanctae Iuuauensis ecclesiae metropolitano et archicappellano nostro supplicante quasdam res proprietatis nostrae ad iam dictam principalem diocesis suae sedem, ubi sanctus electus dei confessor Hrodbertus corporaliter requiescit, perpetuo consistendas tradidimus, id est curtem Ardienga nuncupatam in ripa fluvioli, qui vulgo Semita vocatur, consistentem cum iure legum, sicut mater nostra bonae memoriae Liutsuuind ex parte nostra prasenti^a) tempore in beneficium habere visa est, totum cum appenditiis suis, videlicet curtilibus et aedificiis familiis mancipiis utriusque sexus agricolis vinitoribus campis ecclesiis decimis censibus vineis agris pratis pascuis silvis silvarumque usibus pastibus scilicet et aeficiorum^b) lignis in forestibus nostris Helfindorf et Suindaha aquis aquarumque decursibus molinis piscationibus viis et inviis, exitibus et reditibus, terris cultis et incultis, quaesitis et inquisitis, mobilibus et immobilibus et omnibus iuste legitimumque ad praelibata loca aspicientibus. Haec itaque universa ad supradictum sacrosanctum locum per hoc praesens auctoritatis nostrae praeceptum pleniter in dei nomine roboratum tam pro nostra quam [etia]m pro divae memoriae antecessorum nostrorum christianissimorum regum comme[m]oratione in usus fratrum domino ibidem famulantium regali potentia tradidimus atque contulimus eo videlicet rationis tenore, ut praetitulatus religiosae vitae praesul successoresque illius de his omnibus firmissimam perpetuis temporibus habeant potestatem, sicut de caeteris episcopii sui rebus prout eius placuerit universa disponere sine ullius successoris nostri impedimento. Et ut haec auctorita largitionis nostrae inviolabilem per omnia volventis mundi curricula obtineat stabilitatem, manu nostra subtus eam roborantes anulo nostro iussimus insigniri.||
Signum domni Arnolfi (MF) serenissimi regis. ||
Engilpero notarius ad vicem Deotmari archicappellani recognovi et SR. SD.||
Data VII idus mart., anno dominice incarnationis DCCCXCI, indictionem autem VIII, anno Christo propitio regni domni Arnolfi regis I.; actum Reganespurc; in dei nomine feliciter amen.

Source Fulltext: Salzburger Urkundenbuch, II. Band, Urkunden von 790 bis 1199. Willibald Hauthaler und Franz Martin. S. 65.