+ In nomine domini nostri Iesu Christi amen. Anno domini MCCXII, indic(tione) XV, die primo intrante iulio, in presentia Gebuwardi episcopi Tergest(ini), Walteri Gurcensis episcopi, Ottonis prepositi Gurcensis, Henrici archidiaconi, Stephani decani Aquilegensis, Epponis prepositi sancti Petri in Carnia, Walteri, Bernardi plebani Villacensis, Bertoldi plebani de Riez, Odolrici plebani de sancti Roberto, Conradi, Dietalmi, Woluini, Hermanni capellanorum domini patriarche, Colonis, Friderici capellanorum Gurcensis episcopi, Dietrici de Trichan(o), Henrici de Wizenstein, Leonardi de Trichan(o), Werneri et Henrici fratrum de Sudrio, Amelrici de Osopo, Iohannis de Zuccula, Ottaci de Pertenstein, Iohannis de Vrsara, Pabonis de Hohenburc, Pabonis filii eiusdem, Offonis de Gurniz istorum et aliorum multorum rogatorum testium de lite, que vertebatur inter dominum Wolfkerum patriarcham Aquilegensem et dominum Eberhardum Salzburgensem archiepiscopum, in qua dominus patriarcha petebat Grazlup, Ratenstein, Swabec cum castris ministerialibus famulis et omnibus pertinenciis suis, que omnia comes Woluradus unacum uxore sua comitissa Emma et filio suo patriarcha Wolrico ac filia sua comitissa Wilibirgi Aquilegensi ecclesie donaverat proprietario iure, prout patriarcha firmiter asserebat, insuper castrum Legnenberc et castrum Materei cum omnibus suis pertinenciis, que prefata comitissa Wilibirgis uxor comitis Henrici de Liskemud in extremis suis similiter Aquilegensi ecclesie presente marito pro anima sua contulerat, ut patriarcha dicebat. Super his inquam omnibus nos Henricus prepositus de Solio, Conradus de Tisentin archipresbiter de Wolkenmarket, Coradus, Marcelinus filius domini Henrici de Glemona, Wernardus Villacensis archidiaconus, Henricus de Glemona, Fridericus de Pettouia arbitri constituti de voluntate parcium talem inter eos conpositionem sive transactionem fecimus. Precepimus siquidem ipsi patriarche sub debito iuramenti, quo nobis erat astrictus, quod omni liti iuri et actioni, quam in predictis possessionibus habebat vel videbatur habere, insuper iuri patronatus in ecclesia de Mulzpuhul cederet et finem faceret pro se et ecclesia sua dicto archiepiscopo et ecclesie sue salvo iure feudi ministerialium ecclesie utriusque ita, quod tam Aquilegensis quam Salzburgensis ecclesie ministeriales in predictis possessionibus feudum suum sequantur. Quo facto et conpleto precepimus predicto archiepiscopo sub debito iuramenti, quo nobis erat astrictus, quod Edelacum et alias villas omnesque possessiones tam cultas quam incultas tam dominicalia quam infeudata et omnes possessiones, quas in Foro Iulii habebat vel videbatur habere, cum famulis colonis habitatoribus ministerialibus quoque, si qui reperirentur, et omnibus pertinenciis suis ipsi patriarche et ecclesie sue perpetuo habenda et possidenda pro se et ecclesia sua conferret et quiete dimitteret nec deinceps Aquilegensem ecclesiam super his per se vel per alios molestaret. Que omnia idem dominus archiepiscopus de consensu clericorum et ministerialium suorum fecit et plenarie conplevit et nuncium dedit atque constituit patriarche scilicet dominum Gebuwardum Tergest(inum) episcopum, qui eum in tenutam et possessionem omnium predictorum vice sua posuit. Et ut ista omnia inviolata et inconvulsa perpetuo maneant, ea per manum puplicam^a) scribi et sigillis eorum et capitulorum suorum muniri fecimus. Acta sunt hec in Carnia in villa, que dicitur Auasaz, ante capellam, de voluntate parcium et precepto arbitrorum.||
Ego Laurencius invictissimi Rom(anorum) imperatoris Ottonis notarius interfui, vidi, audivi et rogatus scripsi.||
S.^b) S.^c)

Source Fulltext: Salzburger Urkundenbuch, III. Band, Urkunden von 1200 bis 1246. Willibald Hauthaler und Franz Martin. S. 158-159.