In nomine sancte et individue trinitatis. Otto dei gratia prepositus, Fridericus decanus totumque capitulum ecclesie Salzburgensis dilectis in Christo fratribus et amicis Eberhardo venerabili abbati in Salem eiusque conventui imperpetuum. Cum transcursus temporum acta hominum a memoria soleat removere, sollers antiquorum prudentia scripture remedium adinvenit sicque fiunt antecessorum gesta posteris bene nota, que alias antiquitatis oblivio aboleret.¹⁾ Proinde presenti scripto vobis ac successoribus vestris volumus esse notum, quod nos non immemores mutue karitatis, que inter ecclesiam nostram et conventum vestrum viguit ab antiquo nec non beneficiorum nobis in equa portione proventum saline per vos primitus impensorum omnia, que in maiori civitate Halle ecclesia nostra possidet in patellis, aquis salsis, areis, agris, pratis silvis ripis aquarum locisque curtilibus aptis ad sales decoquendos hominibus exceptis et theloneo communia hylari vultu volumus esse vobis ita, ut quicquid exinde utilitatis provenerit, equa tam nobis quam vobis portione dividatur idemque proventus et cultura sub tutelam et custodiam conversi de cenobio vestro, qui ad hoc utilis fuerit, deputentur. Et ne ista a nobis vel successoribus nostris infringi valeant vel mutari, presens instrumentum super hoc confectum, quo omnis presumptionis temeritas et dubium elidatur, sigillo ecclesie nostre iussimus roborari. Acta anno domini millesimo ducentesimo quinquagesimo tertio, indictione undecima.||
S.^a)

Source Fulltext: Salzburger Urkundenbuch, IV. Band, Urkunden von 1247-1343. Franz Martin. S. 21-22.