+ In nomine sancte trinitatis. Ego Albertus dei gracia Sazburgensis^a) ecclesie archiepiscopus, apostolice sedis legatus, cunctis Christi fidelibus salutem in perpetuum. Ut frater fratrem non circumveniat nec ab eo circumveniri queat, eapropter controversias inter ecclesias et ecclesiasticos viros ortas que rationabili fine et optata utriusque partis pace sopite sunt, decrevimus eas in posterum scripti nostri privilegio munire, ne in recidivam questionem in posterum deducta possit a quoquam ecclesia vel ecclesiastica persona in iure gravari. Cuius sane rei gracia significandum duximus modernis et in posterum futuris omnibus, quod causa quedam, que gravis hactenus inter dominum abbatem Odalricum Milstatensem et domnum Albertum de Lysereke parrochianum emerserat, per varios iudices a domino papa delegatos diu tractata est super quibusdam decimis et capellis et tandem coram nobis cum coniventia utriusque partis hac forma pax facta est, ut domno Alberto et matrici ecclesie de tota controversia ecclesia una, que Celsach vocatur, cum dote sua iuxta Lyseram cedat, reliqua vero que sub questione erant tam in decimis quam in capellis cedant potestati et usibus fratrum perpetuo tenenda. Huius transactionis testes sunt: dominus Dietricus Gurcensis episcopus, dominus Hermannus archidiaconus, dominus Ekkehardus prepositus - hii etiam fuerunt iudices a domino papa delegati; dominus Hartnidus prepositus, dominus Meinhalmus archidiaconus, Geroldus Cesarius Albo Heinricus Chunradus capellani; Heinricus castellanus, Rahwinus et frater eius Reinboto, Pabo^b) et frater eius Chvnradus de Frisaco, de Weruen Chvno et Ortolfus, de Gebbeningen Luitwinus et Heinricus, de Surberch Siboto; Gurcenses: Alexander, Otto et frater eius Hartwicus, Perhtoldus et filius eius Heinricus, et alii quam plures. Datum Frisaci, anno domini MCLXXXVIIII^o, anno domini Clementis pape primo, domini Alberti vero anno XX^o, regnante adhuc domino imperatore Romanorum augusto Friderico, tenente regnum domino Heinrico filio eius inclyto rege, indict. III^a, VIII^o X^o kal. mai., anno bisextili et embolismali. M^c)

Source Fulltext: Salzburger Urkundenbuch, II. Band, Urkunden von 790 bis 1199. Willibald Hauthaler und Franz Martin. S. 616-617.