Nos Albertus Berchtoldus Lupoldus fratres et comites de Bogen notum facimus per presens scriptum tam presentibus quam futuris, quod cum pater noster comes Albertus de Pogen instante sibi necessitate Gu/orkvelde castrum et possessiones eidem adtinentes domino et consanguineo nostro Alberto venerabili Salzburgensis ecclesie archiepiscopo pro octingentis marcis argenti Frisacensis ponderis obligasse loco pignoris ita quod si in terminis ab eis constitutis non eadem pecunia solveretur antedictum castrum et possessiones cederent ecclesie Salzpurgensi, ut ab eisdem possessionibus plene reciperet usufructus et castrum in sua custodia detineret donec memorata pecunia solveretur. Sed quia idem dominus et consanguineus noster ob dilectionem patris nostri et matris nostre peticionem, que sibi consanguinitatis linea adtinebat, solutioni aliquamdiu supersedit, quod nec castrum in suam potestatem recepit nec usufructus possessionum usurpavit propter hoc maxime quod pater noster fide data promisit si aliqua occasione sepedictum castrum et possessiones a se vel suis heredibus vellet alienare vel per venditionem vel per locationem quod hoc faceret ecclesie Salzpurgensi. Cum autem idem dominus noster Albertus Salzburgensis archiepiscopus et pater noster comes Albertus pecunia non soluta decessissent et dominus Eberhardus Brixinensis episcopus successisset, nos quoque paternam hereditatem intrassemus, idem Eberhardus Salzburgensis archiepiscopus tam super memorata pecunia quam super possessionibus cum retentis fructibus nos convenit. Nos vero super eadem solutione gravari timentes adtendentes etiam promissum patris nostri ad hanc conpositionis formam de nostrorum fidelium et aliorum prudentum consilio convenimus cum eodem archiepiscopo Eberhardo sic videlicet, quod sepedictum castrum Gurkuelde cum suis possessionibus tam infeodatis quam non infeodatis nec non cum ministerialibus eidem Castro adtinentibus omni iure quo possedimus a progenitoribus nostris in proprietatem tradidimus ecclesie Salzpurgensi ab ea in feudo postmodum recipientes tali conditione adiecta, ut si nos contingeret decedere sine heredibus in potestatem Salzpurgensis ecclesie libere rediret prestantes insuper iuramentum, ut circa fideles nostros faceremus quod hec omnia servarentur. Dominus igitur Eberhardus Salzpurgensis archiepiscopus nostram devotionem circa ecclesiam recognoscens remisit pecuniam pro qua pro patre nostro fuimus ecclesie obligati renuntians obligationi cum perceptis fructibus dampno quoque quod ecclesie per patrem nostrum in possessionibus suis Altenbuch et Durftigenberge^a) intulisse dicebat octingentas etiam marcas ponderis Frisacensium nobis insuper de consensu capituli et consilio ministerialium erogavit. Huius rei testes sunt: Vlricus dux Carinthie, Wilhalmus comes de Malntin, Otto, Gotfridus et Cholo fratres de Tru/ochsen, Reinbertus de Mûrekke, Wichardus de Karlsperc, Heinricus castellanus de Frisaco, Albertus de Risperc, Fridericus de Petowe, Otto de Kunegesperc, Chûno de Weruen, Cunradus castellanus de Salzburc, Ekehardus de Tanne, Heinricus de Harskirchen, Cunradus de Kalheim, Marcwardus et Gerhous fratres de Bercheim, Ortolfus de Montparis, Otto de Leimenz, Heinricus de Lichtenperc, Albertus de Maierowe, Offo de Gurnz, Ortolfus de Gurkuelde, Pertoldus de Menna, Gerhous de Vremerichesperge et alii quam plures nobiles et vulgares. Acta sunt hec apud Solium in ecclesia sancte Marie, anno ab incarnatione domini M°CC°II°. In argumentum itaque et memoriam huius facti presens Privilegium conscribi et sigillo patris nostri, quo tunc temporis omnes pariter utebamur, iussimus roborari.||
SD.^b)

Source Fulltext: Salzburger Urkundenbuch, III. Band, Urkunden von 1200 bis 1246. Willibald Hauthaler und Franz Martin. S. 28-29.