C. ++ In nomine sancte et individue trinitatis. Fridericus divina favente clemencia Rom(anonun) rex et semper augustus et rex Sicilie. ++ Quoniam nos fidelium nostrorum, qui sincera nos devotioni respiciunt, iustis postulationibus aurem benignam tenemur inclinare et eorum conmoditatibus propensius providere, inde est, quod nos advertentes preclara devotionis obsequia, que dilectus princeps noster Eberhardus venerabilis Salzpurgensis ecclesie, apostolice sedis legatus, iam nobis exhibuit et domino dante in posterum ipsum nobis exhibiturum non dubitamus, ad postulationem ipsius duximus confirmandum privilegium ab Ottone quondam Rom(anorum) rege datum, cuius hec est continencia: Regalis excellencie nostre decet equitatem subiectorum conmodis curam diligentem inpendere et causas seu etiam lites, quociens coram nobis emerserint, quo pacto decidantur, scripture amminiculo perpetuare, ut in posterum omni careat ambiguitate, quod prius a plerisque perverse in questionem^a) duci solebat. Eapropter noverit universorum imperii fidelium presens etas et succesura posteritas, quod cum apud Nv/orenberc * sub frequencia principum curiam sollempnem celebraremus, W(altherus) venerabilis Gvrcensis episcopus unâ cum ecclesie sue familia et in nostra constitutus presencia exposuit nobis, quod ecclesia Gvrcensis eo modo fundata est et dotata, quod ad imperium et nos nec non ad successores nostros Rom(anorum) imperatores et reges solummodo deberet habere respectum in hiis, que ad temporalem pertinent iurisditionem^b). Dilectus itaque princeps noster Eberhardus Salzpurgensis archiepiscopus econtra proposuit, quod memorata Gurzensis ecclesia ab antecessoribus suis taliter constructa esset et de prediis et decimis Salzpurgensis ecclesie in primis sue fundationis annis adaucta, quod Salzpurgensi ecclesie sibique et omnibus successoribus suis tam in spiritalibus quam in temporalibus nullo mediante deberet esse subiecta et pro regalium receptione sibi hominium facere, quemadmodum ipse archiepiscopus nobis facere solet, ostendens illud multis rationibus. Primo probavit per privilegia Heinrici quarti Rom(anorum) regis et Friderici Rom(anorum) imperatoris roboratum et per quietam quam ipse et antecessores sui longo tempore possessionem habuissent quam possessionem coram nobis vivis testibus conprobavit. Probavit etiam coram nobis Gurzensibus presentibus, quod quando Gurzenses ministeriales fidelitatis prestant suo episcopo iuramentum ipsum archiepiscopum, qui tunc fuerit in ecclesia Salzpurgensi, solum excipiunt imperio pretermisso. Intellectis vero singulis, quo ab utraque parte proponebantur atque super hiis sententiam principum nobis requirentibus Engelhardus venerabilis Nvenburgensis episcopus taliter protulit sententiam, quod archiepiscopus Salzpurgensis et sua ecclesia absque refragatione obtinere deberet possessionem quam tantorum principum videlicet Hen(rici) * et Frid(erici) imperatoris privilegiis et vivo testimonio conprobasset. Quam sententiam interrogati principes universi secundum imperialis aule consuetudinem et equam et observandam unanimiter proclamarunt. Nos itaque deo * auxiliante in cunctis agendis nostris iusticie tenere semitam cupientes ecclesiam Gvrzensem in hiis, que ad nos pertinere videbantur, Salzpurgensi ecclesie cum omni iure investiture regalium adiudicamus ac deinceps decernimus esse subiectam omnibus episcopis Gurzensis ecclesie et eius ministerialibus, ne a modo Salzpurgensem archiepiscopum, qui pro tempore fuerit, in causam trahant aut sibi hominium facere episcopi recusent et debita prestare obsequia adtencius inhibentes. Statuimus etiam, quod ministeriales Gurzensis ecclesie in prestando fidelitatis proprio episcopo iuramento solum Salzpurgensem archiepiscopum, qui tunc fuerit, excipiant imperio pretermisso nolentes tamen propter talem exceptionem predictos ministeriales ius episcopalium sedium ministerialium amittere vel deteriorare sed potius eis integrum volumus conservare. Cum igitur constet memoratum Ottonem quondam Rom(anorum) regem ante tempora sue excommunicationis insertum presenti pagine Privilegium dedisse, nos amore dilectissimi principis nostri E(berhardi) venerabilis Salzpurgensis ecclesie archiepiscopi, quem in omnibus semper honorare intendimus, ipsum Privilegium approbamus autenticamus et regali auctoritate confirmamus statuentes et regia auctoritate districte precipientes, ut nulli unquam persone alte vel humili, ecclesiastice vel secculari^b) licitum sit huic nostre confirmationis pagine contradicere seu aliquo ei temeritatis ausu obviare. Quod qui facere presumpserit in sue presumptionis penam mille lib(ras) auri examinati conponat, quarum medietas fisco nostro, reliqua vero medietas passis iniuriam persolvatur. Testes huius rei sunt: Wolfgerus patriarcha Acquileg(ensis), Otto Frisingensis episcopus, Cvnradus Ratisponensis episcopus, Manegoldus Pattauiensis episcopus, Cvnradus Brixiensis episcopus, Fridericus Tridentinus episcopus, Cvnradus Constanciensis episcopus, ^c) Basiliensis electus, Ludowicus dux Bawarie, Hermannus marchio de Baden, comes Hartmannus de Wirtenberc, comes Ludowicus de Ottingen, comes Heinricus de Burg/vwe, comes Heinricus de Greifesbach, comes Albertus de Eberstein, comes Burkardus de Mannesfeld, Heinricus marscalkus de Kallendîn, Waltherus pincerna de Schipphe et alii quam plures.||
++ Signum domini Friderici Rom(anorum) regis invictissimi et regis Sicilie. ++||
M Ego Cvnradus Spirensis et Metensis episcopus imperialis aule cancellarius vice domini Sifridi Magunt(ine) sedis archiepiscopi et tocius Germanie archicancellarii recognovi.||
Acta sunt hec anno dominice incarnacionis M°CC°XIIII°, regnante domino Friderico Rom(anorum) rege et semper aug(usto) et rege Sicilie glorioso anno regni Rom(anorum) II, regni vero Sicilie XVI°. Dat. apud Augustam per manus Bertoldi regalis aule prothon(otarii), XI kalend.marcii, indictione II^a.||
BD.^d)

Source Fulltext: Salzburger Urkundenbuch, III. Band, Urkunden von 1200 bis 1246. Willibald Hauthaler und Franz Martin. S. 181-183.