C. ++ In nomine sancte et individue trinitatis. Fredericus divina favente clementia Rom(anorum) rex secundus semper augustus et rex ++ Sycilie dilecto principi suo Eberhardo Salzpurgensi archiepiscopo ++ in perpetuum. ++ Religiose ac pie intentionis tue propositum auguste liberalitatis gratia adiuvantes honeste peticioni tue aurem benivolam inclinamus de maiestatis regie tibi munificentia concedentes, ut due kathedrales ecclesie videlicet Chiemensis et Sekowensis, quas de Romane sedis licentia et regie benignitatis applausu nec non et de principum nostrorum assensu de ecclesie tue construxisti et dotasti redditibus et ex defalcatis a tuo diocesi certis distrinxisti limitibus apud maiestatem imperii tantum honorem obtineant et, si quis procedente tempore vel castra vel ministeriales monetas et thelonea vertigalia eciam vel quascunque publicas functiones pro salute anime sue vel quocunque titulo eis conferre voluerit, hec omnia eis liceat nomine regalium possidere et episcopi earum a te a successoribus tuis, qui a tempore fuerint, more fassallorum^a) ea recipiant et cum iuramento fidelitatis prestent hominium et in iuramento fidelitatis nullum penitus excipiant vel excludant. Ministeriales vero earundem ecclesiarum iuramentum fidelitatis suis prestent episcopis et in iuramento illo nullum excipiant preter solum archiepiscopum Salzpurgensem et ipsi omnia ministerialium iura obtineant, que ministeriales ecclesiarum Alemannie obtinere hactenus consueverunt. Volumus eciam, ut vacantibus eisdem sedibus regalia ad solum archiepiscopum respectum habeant, donec ipse vacanti ecclesie in pastore provideat, qui regalia de manu ipsius in forma recipiat supradicta. Adicimus eciam, quod si prefatos episcopos curiam regiam frequentare contigerit, licentiam habeant pontificales sedes publice deferendi. Huius rei testes sunt: Theodoricus Treuerorum archiepiscopus, Erbipolensis episcopus, Otto Frisingensis episcopus, Vlricus Patauiensis episcopus, Chunradus Ratisponensis episcopus, Chuno Fultensis et Elvacensis abbas, Lv/odevicus comes palatinus Rheni dux Bauuarie, Theobaldus dux Lothoring(ie), Heinricus comes de Ortenburc, Rapoto comes palatinus Bauuarie, Burchardus comes de Mannesuelde, Hermanuus comes de Hartspurc, Eberhardus comes de Dornberc, Anshelmus de Iustingen marescalcus, Wernherus de Bonlant dapifer, Vlricus de Mincenberc camerarius, Chunradus de Chlingenburc pincerna et alii quam plures.||
++ Signum domini Frederici secundi Rom(anorum) regis semper augusti et regis Sycilie. ++ M||
Ego Chunradus Metensis et Spirensis episcopus imperialis aule cancellarius vice domini Siefridi Moguntin(e) sedis archiepiscopi tocius Germanie archicancellarii recognovi. Acta sunt hec anno dominice incarnationis millesimo ducentesimo XVIII°, regnante domino nostro Frederico secundo Rom(anorum) rege semper augusto et glorioso rege Sycilie anno regni eius sexto; dat. apud Nurenberc, VII° kal. novembris, indictione septima.||
SD.^b)

Source Fulltext: Salzburger Urkundenbuch, III. Band, Urkunden von 1200 bis 1246. Willibald Hauthaler und Franz Martin. S. 250-251.