In nomine sancte et individue trinitatis amen. Eberhardus dei gratia Salczeburgensis archiepiscopus, apostolice sedis legatus, imperpetuum. Ut gesta principum, que prudentioris consilii moderamine gubernantur, perpetuitatis sue fine debito non priventur, expedit et oportet ut contra detestabilem oblivionis morbum, qui subrepit fraudulenter, scripta testimonio percipiant firmamentum. Hinc itaque notum esse volumus universis tam presentibus quam futuris^a), quod nos videntes dilectarum in Christo sororum abbatisse^b) et conventus monasterii sancte Marie Magdalene in Wienna Cisterciensis ordinis penuriam temporalium^c) et defectum tanto earundem cogitavimus solicite defectibus subvenire, quanto ipsarum speramus orationibus assiduis adiuvari. Cum itaque sexui fragiliori sit fortioribus consiliis et auxiliis succurrendum, ipsis de nostra liberalitate una cum consensu capituli nostri duo talenta nudi salis contulimus annuatim, que ipsis officiales et salinarii^d) nostri, qui pro tempore fuerint, assignabunt certis temporibus in Salina et salis huius solutionem annis singulis in festo beati Georii deputamus. Ut autem hec nostra donatio per oblivionem non valeat in posterum aboleri^e) aut involvi caligine vetustatis, presentem paginam super hoc conscriptam sigilli nostri munimine iussimus communiri^f). Testes sunt: Heinricus Seckowensis episcopus, Vlricus Lauendinensis episcopus, Albertus prepositus Salczeburgensis, Cuno decanus, Heinricus subdecanus, Hoholdus custos, Vlricus cellerarius, Bernhardus prepositus Frisacensis, Eckehardus de Tanne, Carolus de Gutrat^g), Otto de Goldecke, Heinricus burcgravius^h) de Saltzeburg, Vlricus de Velwer, Heinricus Raspo, Heinricus vicedominus Salczeburgensis, Vlricus de Wispach, Heinricus et Conradus de Truchtleichingen, Libardus de Tegernwach, Rudegerus de Perchaim et alii quam plures. Actaⁱ⁾ sunt hec anno domini MCCXXXIIII, XI kal. martii, inditione^k) sexta; feliciter amen.

Source Fulltext: Salzburger Urkundenbuch, III. Band, Urkunden von 1200 bis 1246. Willibald Hauthaler und Franz Martin. S. 453-454.