++ In nomine sancte et individue trinitatis amen. ++ Ne labantur cum tempore que nostro geruntur in tempore, necesse est, ut memoriter retineatur et in scriptis redigatur. Notum sit igitur cunctis Christi fidelibus tam presentibus quam futuris presentem paginam inspecturis, quod cum dominus Hermannus comes de Ortenburch et dominus Willehelmus comes de Hivnenburch inter se diu discordarent eô, quod iam dictus Hermannus comes de Ortenburch heredes suos ius hereditarium in prediis domini W(illehelmi) comitis de Hivnenburch habere asseruit, demum tali remota discordia ad amicabilem composicionem devenerunt sub tali videlicet forma, quod dominus W(illehelmus) comes de Hivnenburch castrum Lessach et predium secundum ius, quod in utroque habebat, cum hominibus et omnibus pertinenciis suis quesitis et inquisitis, cultis et incultis, pascuis et aquis, adiunctis eciam quibusdam nobilibus personis masculini et feminei sexus scilicet filiam domini Pilgrimi de Mallentin et fratrem suum Meinhardum, uxorem Otlini de V/oresperch, uxorem domini Perhtoldi clerici cum heredibus eius preter unam filiam, uxorem domini Alberonis Murscel similiter cum heredibus eius, Pilgrimum et fratrem suum de Lessach Otlinum domino H(ermanno) comiti de Ortenburch suisque heredibus in presencia principis terre domini Bernardi illustri^a) ducis Karinthie nec non domini Bernardi filii sui libere dedit et donavit post mortem fratris sui domini Alberti Patauiensis ecclesie canonici possidendum. Cum tali vero donacione predictos heredes domini H(ermanni) comitis de Ortenburch a se et propriis heredibus separavit ita, quod eorum iuri hereditario et quibusdam debitis nec non aliis, pro quibus sepe dictum dominum W(illehelmum) comitem de Hivnenburch impetebant, renunciaverunt. Constituit eciam ipse comes W(illehelmus) premisse donacionis ab omni impeticione, que adversus eos posset oriri, sicut iuris exigit racio, se et suos heredes eorum debitores nec non coadiutores firmiter astantes contra omnes, qui in posterum eos propterea inpugnare atteptarent.^b) Quod si non facerent vel premissa infringere vellent, in penam cadant quingentarum marcarum argenti et nichilominus ius hereditarium et impeticio debiti ad predictos heredes comitis H(ermanni) de Ortenburch revertatur, sicut prius, qui e converso ad talionem se sub pena predicta obligaverunt, si premissis contraibunt adiecto quoque tali pacto inter utriusque comitis heredes, si forte quod absit unius comitis heredes sine legittimo herede femineo vel masculino decedere contingeret, ad alterius comitis heredes predia mutuo debeant redire. Huius rei testes sunt viri strennui^c) et discreti sic nominati: Heînricus de Grauenstein, W/olricus frater suus de Truhsen, Wichardus de Chalresperch, Heinricus de Silberberch, Chuno de Vriberch, Hertwicus dapifer de Weisenberch, W/olricus de Liebenberch Rudlinus de Leibaco, Eberhardus de Griuen, Reinhardus de Tiuen, Guntherus de Chinnenberch, Gotfridus de Hafnerburch, W/olricus de Hafnerburch et alii quam plures nec non ego Berhtoldus de sancta Radegunda plebanus, qui hiis omni^c) interfui et rogatus scripsi. Ad habundantem autem cautelam, ut in posterum premissa omnia in irritum revocari non debeant, presens scriptum sigillo domini Bernardi illustris ducis Karinthie^d) appensis eciam parcium sigillis est communitum. Acta sunt hec anno domini M°CC°XXX°VIIII°, indict. XII^e, mense ianuar, quarto die exeunt.||
S.^e) SD. S.^f)

Source Fulltext: Salzburger Urkundenbuch, III. Band, Urkunden von 1200 bis 1246. Willibald Hauthaler und Franz Martin. S. 494-495.