Eberhardus dei gratia Salzburgensis archiepiscopus, apostolice sedis legatus, omnibus in perpetuum. Quoniam ea, que geruntur in tempore, per decursum ipsius sepius obfuscantur, hoc remedium oblivionis morbo salubriter est occursum, ut acta hominum redigantur in instrumenta publica sigillorum ac testium nominibus insignita. Hiuc est, quod ad noticiam universorum^a) cupimus pervenire, quod nos dilectis fidelibus nostris castellanus de Reichsperch pro eo, quod idem castrum nobis tamquam vero domino ipsius ultro et amicabiliter assignarunt, condiciones subscriptas bona fide promittimus inviolabiliter observandas: primo quidem, quod ad redemptionem consanguineorum ipsorum, quos H(artnidus) de Ort captivavit, fideliter pro viribus nostris operam inpendemus; secundo autem, quod cum eodem H(artnido) de Ort nec pacem nec treugas ullo umquam tempore subibimus, nisi iam dictorum castellanorum consensu et consilio accedente et quod iusticiam eis fieri a predicto H(artnido), super ablatione feudorum suorum allaborabimus plena fide; tercio vero, quod partem castri, quam domina Gertrudis bone memorie^b) de Gu/otrat olim nisa est vendicare, ab ea et eiusdem heredibus specialiter absovemus^c) et absolvendi ab inportunitate omnium heredum quorumcunque idem castrum inpetentium operam dabimus sine fraude^d); quartam vero et ultimam promissionem nos eis talem fecisse publice protestamur, quod recepto ab eis iuramento integre fidelitatis, cuius forma hec est, quod predictum castrum, quod eis custodiendum secundum iura Salzburgensium conmisimus, nobis et nostris successoribus legitime kathedram episcopalem adeptis fideliter custodiant et, cum requiretur, assignent et quod honorem et utilitatem Salzburgensis ecclesie pro posse suo promoveant - iura ministerialium eis plenarie concessimus et heredibus eorumdem in perpetuum irrefragabiliter habituris ita, quod et ipsi et eorum posteritas, si quos evicerimus, se nostre speciali gratie et protectioni gaudeant^a) aggregatos et ab eodem castro numquam nisi evidenti causa cogente aliquatenus amovendos. Ut igitur ipsorum in nostram potestatem subdicio nec non circa eos nostra rata sit promissio, duo paria presentium super hiis confecimus bulle nostre ac testium nominibus, qui eidem interfuere negotio, munimine roborata.||
Testes:^e) dominus episcopus Lauendinensis, dominus Raspo, dominus Dietmarus de Griuen et frater suus, dominus Fridericus et frater suus, dominus Otto de Porta et frater suus, dominus Otto Vngenade et frater suus, dominus Dietmarus de sancto Stephano et frater suus, Wlfingus de Leibenz et frater suus, dominus Chvnradus de Horneke et filius suus, dominus Otto de Matrei et dominus Levtfridus, Albertus de Reichenstein et dominus Wulfingus de Hannowen. Dat. apud Wolfsperch, anno incarnationis M°CC°XLI°, indictione XIII, II non. april.^e)||
S.^f)

Source Fulltext: Salzburger Urkundenbuch, III. Band, Urkunden von 1200 bis 1246. Willibald Hauthaler und Franz Martin. S. 518-519.