Adolfus dei gracia Romanorum rex semper augustus venerabili C(hunrado) Salzburgensis ecclesie archiepiscopo apostolice sedis legato principi suo karissimo graciam suam et omne bonum. Si iusta fidelium peticio facilem fidelem et benignum assequatur de favore regnantis assensum, et in eis ex fidei debito serviendi crescit affectus et per eorum obsequia regalis solii titulus exaltatur. Sane cum sicut tua nobis insinuacio patefecit, tu^a) villam forensem ecclesie tue Leibenizt^b) propter Vngarorum insultus; qui tanquam contermini ville eidem ipsam terram circumpositam frequencius opprimunt et impungnant^c), muro cingere ac meniis et turribus communire et Vannesdorf et Beiersdorf castra eiusdem ecclesie tue, que dux Austrie destruxisse dinoscitur, ad loca alia tibi et ecclesie tue magis accomoda transferre desideres, nostro culmini supplicasti, ut id tibi de benignitate regia concedere dignaremur. Nos igitur devotis tuis supplicacionibus benignum impercientes assensum pariter et consensum tibi et per te ecclesie tue libenter et liberaliter concedimus postulata, dantes has nostras litteras maiestatis nostre sigillo munitas in testimonium super eo. Nulli ergo omnino hominum liceant hanc nostre concessionis paginam infringere vel ei in aliquo ausu temerario contraire. Si quis autem hoc attemptare presumpserit, gravem nostre indignacionis offensam se noverit incursurum. Dat. in Vriberg, II non. marcii, anno domini M°CC°LXXXXVI, regni vero nostri anno quarto.||
S.^d)

Source Fulltext: Salzburger Urkundenbuch, IV. Band, Urkunden von 1247-1343. Franz Martin. S. 224.