Ich Gebhart von Velben obrister marschalich des hofs ze Salzburch vergich an disem bri/ef und chu/ende allen den, di in sehent oder ho/erent lesen, wand ich an dem næhsten vreytag nah sand Niclostag, do von Christes geburt waren to/vsent iar und in dem dreuhunderistem iar, an daz geriht gesezzen bin, als ich ze reht solt umb di chlag, di mein herre der ertzbischolf Chunrat von Salzburch gegen V/olrichen dem Drugsætzen ze chlagen hat, darumb daz er meinem vorgenanten herren seinen di/enær und amptman Levtwein von Salzburchoven und des selben sun fræfelich und an alleu schuld in seiner panstat ze Salzburch ze der zeit, do deuselb stat allen leuten gemainchlichen vrey und fridlich nah altem reht und gewonhait gewesen ist und noh sein sol, mit gewaltiger hant in rehter su/on angevertigt und verwndet hat, des her Iacob von dem Turen an meines vorgenanten herren stat als ez mit frag und mit urtail vor mir enther erfunden wart, chlager gewesen ist, so ist dem selben V/olrichen dem Drugsætzen widertailt vor mir nah frag und urtail an demselben geriht meines vorgesprochen herren hulde. Und dar zu/o allez, daz er von demselben meinen herren und seinen gotshous ze Salzburch hat ez sei leben, aigen und inwerdsaigen, daz ist allezsampt ertailt in meines vorgesprochen herren gewalt und seines gotsho/vs ze Salzburch. Und ze einem urchu/end und gantzer stætichait des selben gerihtes, urtail und sache als si vorgenant sint, gib ich disen bri/ef versigelt mit meinem insigel und ouh mit den insigeln der edeln leut hern Ekkharts von Tanne, hern Otten von Goldekk, hern Chunrat von Wartenvels und Gerhohes von Radekk. Der bri/ef ist gegeben ze Salzburch an dem iar und an dem tag als vorgeschriben ist.||
SD. SD. S.^a) S.^b) S.^c)

Source Fulltext: Salzburger Urkundenbuch, IV. Band, Urkunden von 1247-1343. Franz Martin. S. 261-262.