Ich Ekchart von Tann vergich offenbar an disem brief und tu/on chunt allen den, di in sehent eder ho/erent lesen, daz ich meinem lieben gena/edigen herren hern Fridrich ertzbischolf ze Salzburch, legat des stu/ols ze Rom, und sinem gotshous mit verdachtem mu/ot und gu/otem willen meiner housfrown Elspeten, meiner su/en Ekharten und aller meiner erben verchouft han meinen tail des gerichtes ze Ehing, daz sich anhebt ouf dem perg ze Louffen und get hinab fu/er obern Ehing und datz nidern Ehing durch daz dorf und durch nidern Ehing hintz sand Go/ergen und der strazze nach datz Eling durch daz dorf und von Eling der strazze durch daz dorf daz Roting und von Roting hin gegen Holtzhousen ouzzerhalb des dorffes umb gegen Chregen an daz mos und von Chregen wider umb nach Hovnsperger gerichtt untz ouf her gegen Chnotzing und von Chnotzzing wider her ze Louffen ouf den perch mit dem gerichtthabern hu/enern und allen den nu/etzen und rechten, di dazu/e geho/erent, besu/ocht und unbesu/ocht swi si genant sind, als ich ez ze lehen von dem vorgenanten meinem herren und seinem gotshous gehabt han, umb anderthalb hundert pfunt Salzburger pfenning, der ich ga/enzlichen gewert pin und han den egenanten meinem herren gelobt swo er dheinen abganch an dem gerichtt hiet eder funde, daz ich im den sol widercheren dar nach und der abganch ist. Ich verhaizze ouch fu/er mich mein housfrown und alle mein erben an allez geva/erd, daz wir in und sein gotshous vertreten und verantwurten als recht ist nach des landes gewonheit an aller der stat, da er eder sein gotshous umb daz obgenant gerichtt angesprochen wirt und ta/eten wir des nicht, swigetanen schaden des mein herre eder sein gotshous nement, den sol er haben ouf uns und ouf aller unser hab. Di gu/ot, di zu/o dem gerichtt geho/erent, dienent zweihundert metzel habern und sechs metzel, di machent Salzburger mazze dreu schaf habern und fu/emf metzel und sechs und zwaintzik hu/ener und sind also genant: des ersten zwa gu/ot ligent in dem Pu/ocha/ech, item vier gu/ot datz Aglasling, item ein gu/et datz dem Hertzogen von Ja/evstorf geit sechs gerichttmetzel habern und ein hu/en, der Chna/evssel daselbes von einem gu/et zwi und zwaintzich metzel habern und zwei hu/ener, Chunrat sein nachpower als vil, Ru/edel der Pachner von einem gu/ot aindelf metzel habern und ein hu/en, ein gu/ot datz Tal aindlef metzel habern und ein hu/on, item zwai gu/ot datz Zeltsperch, item datz Obern Ehing Seybot item in dem Mesenhof ocht metzel habern und ein hu/on, item Heinrich daselbes in dem Mesenhof als vil, item Perchtolt von Ehing von einem gu/ot sechs metzel habern und ein hu/on, item Perchtolt aber ein gu/et, item der Chirichmayer, item der Vreythofmayer, item ein gut da der Mesner oufsitzet, item ein gut, da Meindel oufsitzet, item ein gu/ot, da der Ha/evniger oufsitzt, item ein hof ouf dem Wasen, item datz Nidern Ehing der Heinrich Mayer ein hof, item der Gu/egelmayer einen hof, item der Smid ein gu/ot, item Dietel der Schuster, item datz Gu/egleinsperch ein gut geit ein hu/on, item daz Eling Hertneid ein gu/ot mit aindlef metzel habern und ein hu/on, item Seybot daselbs ein gu/ot geit als vil, item ein gut, da Lu/edel oufsaz als vil, item ouz disem gerichtt Salman ein hu/en, item datz Piricha/ech ein hof geit sechtzehen metzel habern und ein hu/on, item datz Roting Heinrich ouf der Hu/eb ein gu/ot, item der Murr ein gu/ot geit sechs metzel habern und ein hu/on, item Werntzel ein gu/ot, item der Vngemach ein gu/ot, item Chunrad der Ha/ewer ein gu/ot, item der Ganser ein gu/et geit ein hu/on, item der Rot datz Chu/enreitsperch ein gu/ot, geit aindlef metzel habern und ein hu/on, item Ru/edel daselbes ein gu/ot, geit sechs metzel habern und ein hu/on, item Heinrich daselbs von einem gu/ot als vil, item an dem Stadel ein gu/ot, geit sechs metzel habern und ein hu/en, item datz Prukkerholtz, da Chunrad oufsitzt, geit aindlef metzel habern und ein hu/on, item Pa/ertel von einem gu/ot als vil, item Ekkart datz Holtzhovsen ein gu/ot, item dez Wispechen hold einen hof, item Heinrich der Mayr, einen hof, item Vlrrich der Richter einen hof, item pei der chirchen ein gu/ot, geit ein hu/on, item ein gu/ot, da des Sitelstorffer hold oufsitzt, geit sechs metzel habern und ein hu/on, item datz Chnotzing ein gu/et. Daru/eber gib ich dem vorgenanten meinen herren und seinem gotshous fu/er mich mein hausfrown und alle mein erben disen brief ze einem urchu/end der worheit versigeltn mit meinem anhangenden insigel. Der ist geben ze Salzburch an sand Thomans abent, do von Christes geburd woren dreuzehenhundert iar darnach in dem fu/emf und dreizzkisten iar.

Source Fulltext: Salzburger Urkundenbuch, IV. Band, Urkunden von 1247-1343. Franz Martin. S. 422-423.