Wir Iohans von gots genaden hertzog in Chernden, graf ze Tyrol und ze Go/ertz, vogt der gotsheuser ze Aglay, ze Triende und ze Brixen, veriehen an disem prieve, daz wir mit dem ernwirdigen herren herrn Heinrich dem ertzpischoff von Saltzpurch, legaten des stu/ols von Rom, unserm lieben herren und frewnt die sætze als si vor her zwischen seiner vorvaren und der unsern und auch zwischen unser und der phleg ze Chrophsperch chomen sint, fu/erbaz gerne und willichleichen halten wellen mit so/elher au/ozgeuomenr beschaidenhait, welher unser aintweder er uns oder wir im die sætze absagte oder widersagte und swenne daz wær so su/ellent doch die sætze darnach dannoch ainen mano/ed weren und stæte und pey irr chraft an allez geva'rde mit gantzer fridesamichait beleiben in gantzen triwen mit vollen iren chrefften auch wa des vorgenanten unsers lieben herren und frewnts des ertzpischoff von Saltzpurch leute auz der vorgenanten phlegnu/esse ze Chrophsperch hintz unsern leuten iht ze sprechen hieten, da su/ellent si umbe ain reht nemen und von in su/ochen in unserm lande in den gerihten, da si inne gesezzen sint. Wær auch, daz unser leute hintz seinen leuten in der vorgenanten phlegnu/esse ze Chrophsperch iht ze sprechen hieten, da su/ellent si auch ain reht umbe nemen und suchen in derselben phlegnu/esse, da si inne gesezzen sint. Wær auch ob den unsern von der vorgenanten phlegnu/osse oder von den iren chain schade geschæhe und widerfu/er, der sol in zehant darnach so si ez vodernt, von in in ainem mano/ed widertan und gentzleich widerchert werden. Wær auch, daz der vorgenanten phlegnu/esse oder den iren von den unsern chain schade geschæhe und widerfu/er, der sol in auch zehant darnach, so si ez vodernt, in ainem mano/ed widertan und ze geleicher weise gentzleich widerchert werden. Und verhaizzen die selben sætze in aller der weise als oben beleutert ist fu/er uns und fu/er alle die unsern, der wir gewaltich sein vest und u/enu/ebervarnleich stæt ze halten pey unsern gu/eten triwen an allez geværde. Mit urchu/ende disses prieves, der geben ist au/of Tyrol, do man zalt nach Christes gepu/erde dreuzehenhundert iar und darnach in dem newn und dreizzigisten iar, des eritages nach dem zwelfften.||
S.^a)

Source Fulltext: Salzburger Urkundenbuch, IV. Band, Urkunden von 1247-1343. Franz Martin. S. 443-444.