Urbanus episcopus servus servorum dei. Dilectis filiis. Cesariensi et de hailsprun. monasteriorum abbatibus Augustensis et Eystettensis dyocesum salutem et apostolicam benedictionem. Attendens dilectus filius nobilis vir hainricus de chunring. Marschalcus austrie. illud esse felix commercium. cum terrena pro celestibus conmutantur. pro sue ac parentum suorum animarum remedio. monasterium in quo sint sorores cysterciensis ordinis. de bonis suis in fundo proprio construere ad honorem dei. et beate marie virginis gloriose proponit. Quia vero aliquorum fratrum monasteriorum vestrorum presencia propter hoc dicitur indigere. Discrecionem vestram rogamus. monemus et hortamur attente per apostolica vobis scripta precipiendo mandantes quatenus aliquos de huiusmodi fratribus. quos idem nobilis a vobis pecierit. et vosmagis utiles esse videritis ad construccionem dicti monasterii concedatis. Datum apud urbem veterem VII. Idus maij Pontificatus nostri anno tercio.

Source Fulltext: ZEIBIG, Stiftungsbuch (=FRA II/6, Wien 1853) S. 150