Ich Graf Chvnrat von Schavnberch tvn chvnt an disem prief allen deo di nv sint oder di her nach chvnftig sint, di in sehen oder horent lesen, Daz wir mit wol verdachtem mvt vnd mit gvtem willen vnser selbes vnd avch vnsers brvders hern Wenczlawes vnd vnser hovsfrowen vron Adelheiten vnd mit vnser aller erben gvnst, zv der zeit da wir iz wol tvn machten hawen gegeben mit allem dem recht, als wir iz haben gehabt den geistlichen vrowen vron Elspeten der Aptessinne vnd der samnvnge ze sant Bernhart zv vnser swester vron Agnesen, di in dem selben chloster nvnne ist, zehen phvnt geltes wienner phenning, di vnsers rechten gechavften aygens sint vnd ligent ze Geppendorf mit svlcher bescheidenheit, swan wir oder vnser erben dem vorgenannten chloster dacz sant Bernhart anderhalb hvndert phvnt phennig wienner mvnzze geben, so schvllen di vorgenanten zehen phvnt geltes genczlich vns vnd vnsern erben ledich sein, vnd schol man avch von den zehen phvnten geltes zway phvnt vnserr egenanten swester alle iar geben, daz si da von ire phrvnt vnd ander ir natturft dester paz gepezzern mvge. Vnd daz dicz geschafte vnd dicz ding vnzebrochen vnd stet beleibe, so geb wir disen prief mit vnserm vnd mit vnsers brvder hern Wenczlawes insigel versigelten vnd geloben in auch die oftgenanten gvlt vrein vnd schermen, alz des landes recht in Osterrich ist. Dez dingez sint auch gezevge her Perchtolt der Graf von Hardekk, her Vlrich von Meyssow, her Alber vnd sein veter Jans von Chvnringe, her Hainreich von Cheyawe, her Haydenreich purchgraf von Gors, her Alber vnd sein prvder her Wernhart di Strevnen, her Artolf vnd sein brvder her Ott di Zendel, her Dietmar der Hadmestorfer vnd ander piderb levt genvg, den dicz gescheft chvnt ist. Diser prief ist gegeben vnd dicz dinch ist geschehen, da man raitt von Christes gepvrt drevczehen hvndert iar, dar nach in dem achczehentem iar an sant Luceyntag ze Wienn in der stat.

Source Fulltext: ZEIBIG, Stiftungsbuch (=FRA II/6, Wien 1853) S. 220-221