Ich Hainreich von Stokorn vergich vnd tvn chvnt an disem prief allen den, di in nv oder hernach sehent oder lesen horent, daz ich auf ein halbe hofstat dacz Gravenperg, di da Elspeth di Zwetlerin hat von den vrowen dacz sant Bernhart vnd dient dreiczehen phenning hiet ein anschprach, wand ich nicht west wie si auz meinez vater gewalt, dez ye gewesen waz, chomen waz, da han ich genumen vmb ein halb phvnt phenning und verczeich mich allez meinez rechtes, daz ich vnd mein erben dar an moechten gehaben und gib di auf den vrowen von sant Bernhart in bruder Arnolcz ieres schaffers hant fvr rechtez aygen vnd pin dez ir scherm, als recht ist hie in Oesterrich, vnd gib in dar vber disen prief zy einer ewigen bestetigvng mit meinem insigel versigelten. Geczevg sint dicz dingez her Hainreich von Stoycendorf. her Michel, her Dyetmar, di brvder von Chadaw, her Ortolf, her Ortolf die brvder von Preitenaich vnd ander piderb levt genug. Dicz dinch ist geschehen vnd dieser prief ist gegeben, da man von Christes gepvrde raitte drevczehen hvndert iar und vu^emf vnd zwainczig iar an sant veites tag dacz Egenburch in der stat.

Source Fulltext: ZEIBIG, Stiftungsbuch (=FRA II/6, Wien 1853) S. 233