Ich Friderich pavzze vergich vnd tu^en chunt An diesem brif allen den, di nv lehent vnd hernach chunftich sint, Daz ich dem erbern Gotshavs von Gersten han gegeben daz gv^et am stainrigel gelegen am sweinekke mit gv^etlichem willen aller miner erben, die reht darzv° heten, daz mein rehtz chaufaigen waz, vnd han daz darvm gegeben, daz apt vlrich mir genedich waz, vnd auch durch meiner sele willen vnd durch meiner vodern. Daz daz dem vorgenantem Gotshavs stete beleib vnd vnzerbrochen, gib ich disen brief versigelt mit meinem insigel vnd mit meines bru^ederl vlriches insigel vnd mit des erbern mannes insigel peter ponhalm der chvniginne von Rom phleger datz steyr vnd Hern Marchartz schechen, Hern Heinriches von harawe, Dietriches schenchen von dobra, Ru^egers von zavch, Vnt sint des zevge Her Heinrich vnd Marchart prevhafen, Her vlrich vnd her Ditmar von Tursendorf, Ott vnd Perchtolt schech, Ernst von Lobmich, Herman von chinberch, HeinRich Lipker, wlfinch, Heinrich prunner, Ott snaterGans vnd ander biderb levt. Ditz ist geschehen nach christes geburde vber tavsent iar, drevhundert iar vnd darnach in dem sibenten iar an sant Johans Obent ze svnnbenteN.

Source Fulltext: OÖUB 4 (Wien 1867) S. 526, Nr. 566