Ich Ott Hu^ernein vnd Ich Vlrich algerstorfer genant der Schechinne aidem vren alhaiten, der Got genade, vergehen vnd offen allen, die disen prief sehent oder horent, di nv lebent vnd nach sint chvmpftig, Daz wir nach vnser baider pesten vrevnt rat vnd nach ir weisvnge haben lazzen van dem chrige mit allen vnser paider erben, iz sein sv^en oder tochter, den wir heten gegen apt Otten ze Gersten vnd gegen dem Gotshaus vmb di zwai gu^et in Aschacher pharr, di vnser sweher Ott Schech vnd vnser swiger vre alhait, den Got genade, dar heten geschaft bei ir lebentigen ziten auf dem Eberleinsperge vnd an der leiten vnd vmb di zwo wisen dapei, daz idinv ledichlichen des vorgenanten Gotshaus ze Gersten sint versuht vnd vnversuht, ze holz vnd ze velde mitsampt den wisen vnd pint wir vns auch darzv° mit allen vnsern erben, swaz schaden daz vorgenant Gotshavs an den gv^eten van vns nem oder van vnser baider erben, swie der genant wer, den sol der apt van Gersten, swer der si, vnd daz Gotshavs auf vns haben vnd auf alle dev, vnd wir haben ob der Ens vnd niderthalben der ens vntzen an di Ibs. Daz di sach stet vnd vnzerprochen beleib van vns vnd van vnser baider erben, geb wir ze einem ewigen vrchvnde disen prief versigelt mit hern otten Insigel des Schechen purchrof ze den selben ziten ze steyr vnd mit Hern Marchartz Insigel des prevhavens vnd mit vnser baider Insigeln vnd sint des zevge Her Gundacher, Her Perchtold Her Hertneid vnd Ditrich losenstainer, Her HeinRich vnd her friderich van walse, Her ChvnRat van sevsenekk, Her pernger van Spigelberch, her vlrich pavzze, wolfker der wasner, vtz van Tann, Seidil hvrnein, chvnRat van plesse, Ott hurnbech vnd ander erber levt genv^ech. Vnd ist daz geschehen, da ergangen warn nach christes gepu^erde drevzehen hundert Jar vnd darnach in dem viervnzwaingisten Jar an den heiligen zwelfpoten tag sant Peters vnd sant Pauls.

Source Fulltext: OÖUB 5 (Wien 1868) S. 401-402, Nr. 403