Ich Ott Lonstorfer der alt ze Ens gesezzen vergich vnd offen an disem brief allen den, di in lesent Horent oder sehent, di nv lebent vnd nach chvmftig werdent, Daz ich dem Erbern Gotshaus ze Gersten gegeben Han di aigenschaft an der Hu^eb, di da Haizzet an der Strozze, di mein ledichlichens aigen ist vnd ist gelegen in Hedersperger Pharr mit miner Havsvrowen vren Reitzen vnd mit mines svnes Otten vnd mit aller miner erben gutlichem willen durch Got vnd durch miner vnd miner Havsvrowen vren Reitzen sel Hail vnd Pint auch ich mich mit sampt miner Hausvrowen vnd mit allen minen erben dar zv, daz ich|der aigenschaft vnd des egenanten gutes gewer sein wil an aller der stat, da sein dem Gotshaus ze Gersten durft geschiht. Daz di aigenschaft dem Gotshaus ze Gersten stete vnd vnzerbrochen beleib van mir vnd miner Hausvrowen vnd van allen minen Erben, Gib ich im disen brief ze einem ewigen Vrchvnde versigelt mit minem anhangvnden Insigel vnd sint der sach zevge Her Heinrich, Fridrich vnd Her Rainprecht walseer, Her Gundacher, Her Perchtold, Her Hertneid losenstainer, vlrich Hvsendorfer, Ekkil Schich, Seifrid vnd chunrat welhinger, Heinrich enser vnd ander erber levt. Der brief ist geben, da van christes geburd ergangen warn Drevzehen Hundert Jar vnd dar nach in dem Siben vnd zwainzigisten Jar an sand Bertelmes tag.

Source Fulltext: OÖUB 5 (Wien 1868) S. 491, Nr. 493