WIR Ott von Gotes gnaden Hertzog ze Osterreich vnd ze Steyer Tun chunt offenleichen mit disem brief, Daz ez vor vnser vmb den hof, der leit ze Moln bei der Chirchen, der zwischen den Erbern Erntrawten Rugers seligen witiben von moln vnd Alhaiden der Lonstorferinne in chrieg gewesen ist, also geschaiden vnd vertaidingt ist, daz der furbas an allen chrieg der vorgenanten Erntrawten vnd irer erben mit alle dev, daz dar zu gehoret, sein sol also, daz di vorgenant Alhaid die Lonstorferinne noch ir erben si mit ansprach noch mit chainerlay sache daran nicht irren sol noch mag vnd mag di vorgenant Erntrawt vnd ir erben da mit allen iren frumen geschaffen, versetzen vnd verchauffen oder wie in daz aller beste fueget. Vnd des zu einem vrchund geben wir disen brief versigelten mit vnserm Insigel, Der geben ist ze Steyer an Sunntag Oculi nach Christes geburde Dreutzehen Hundert iar, darnach in funf vnd dreizzigistem Jar.

Source Fulltext: OÖUB 6 (Wien 1872) S. 151f., Nr. 146