Wir Albrecht von Gots gnaden Herczog ze Osterreich vnd ze Steyr Veriechen vnd tun Chunt offenleich mit disem brief, Daz wir tugentleich vnd genedichleich ze rechtem vreyn Lechen verliehen haben vnsern Getrewen Ruegern vnd Niclan den Haiden vnd allen iren Eriben Den Hof ze Moln vnd den Maricht mit allen Hofsteten, vnd da zu^e geho^ert vnd di Hueb pei der Chirchen vnd daz Guet am Ho^erlant vnd di Haide von dem Maricht vncz in di Steyrnich vber all vncz in di Steyr an Steyrer wisen Vnd di Hopfgangwis mit alle, vnd da zu^e gehort, besu^echt vnd vnbesu^echt, wie so daz genant ist, Also, daz chainer vnserer Purgrauen cze Steyr noch amptlewt noch vorster dar auf nichtenicht ze schaffen noch cze richten haben noch gewinnen schullen, weder wenig noch vil vmb dhainerlay sache, ez sei auf dem Maricht inner Hous oder auzzer Hous, Ez sein Vechtwandel oder vnezu^echt oder welherlai daz sei, daz dar auf geschiecht, daz sol alles in daz vorgenant Hous ze Hof gepezzert vnd verwandelt werden also Lantsrecht ist, Dann waz an den Tode get, daz sol vnserr Purgraf pezzern vnd sol man in (im) den antwurten, als er mit Gurtel vmuangen ist, in an schaden. Si schullen sich auch ze den vorgenanten Guetern allen verwitten (sic) mit zimmerholtz, zawnholtz vnd brenholtz in allen vnsern vo^ersten in dem Molntal an alle forstrecht vnd an alle irrung. Wir wellen auch, wer in der wandel wider wolt sein, daz di vnserr purgraf darvmb no^ete so lang, vncz si sich mit in verrichten. Wir haben in auch verliehen vischer ze haben in der Steyr vnd in der Steirnich vnd in der Palten ze dem vorgenanten Hous ze Hoff an alle irrung, als weit di egenant pharr ist. Wer auch in dem vorgenanten Hous ze Hoff ist oder darin geflochen chumt, Der sol freyung haben pei vnsern Hulden, wurd daz indert vber varen, von wem daz wer, der schol darvmb von vns vnd vnsern purgrauen an Leib vnd an Gut swerleich gepezzert werden, wand si vns der rechten beweiset habent mit iren alten briefen, di si von vnsern vordern dar vber gehabt habent, di wir gesechen vnd gelesen haben. Vnd sein auch der oftgenanten Gueter aller vnd waz dar zu gehort mit allen rechten vnd nuczen, als vor geschriben ist, ir Hern vnd Gewern fur allen Gewalt vnd vnrecht, wo in dez no^et vnd durft geschieht, wand si allen iren frum da mit schaffen schullen, verseczen, verchouffen, so iz in aller pest fuegt. Wir gepieten auch ernstleich vnd wellen, Daz all vnser Purgrauen oder wer Steyr inne hat, di egenanten Ruegern vnd Nyclan di Haiden vnd ir Eriben schirmen vnd vrein ze alle dem rechten, als vor hie geschriben stet. Dar vber ze einem vrchunt vnd ewiger sieherhait geben wir disen offen brief besigelt mit vnserm Anhangendem jnsigel, Der geben ist ze Wienn Nach Christes gepurd Tousent, drew Hundert jar, darnach in dem sechs vnd Dreizkistem jar an sant Larencen tag.

Source Fulltext: OÖUB 6 (Wien 1872) S. 212f., Nr. 208