Ich hainreich der keltinger datz Rossatz vnd ich katerina sein hausvrowe vnd alle vnser paider erben veriechen offenbar an disem prief allen den, die in sechent oder horent lesen, daz wier recht vnd reddleich mit verdachtem mvet vnd mit vnser frevnt rat zv dein zeiten, da wir is wol getven machten, verchauft haben auf vnser hofstat vnd auf dem garten, die paidev ligent datz rossatz oben an vnserm haus vnd da wir auch van dienen alle iar an sant Michahels tag zwen phening wienner mvnez ze pvrchrech (sic) in die hveb hern fridrichs van pach, die da leit datz Rossatz, ein halb phvnt phennig wienner mvnizze ebis geltes dem peschaidem mane hern hermane dem priester von spitz vnd heinrich seinem prueder vnd Marigareten seiner swester vnd allen ieren eriben alle iar ze geben au sant Merten tag, als dienst recht ist in osterrich auf pvrchrecht aygen, vm vier phvnt an sechzige phennig wienner mvnizze, der si vns recht vnd reddleich gebert habent Also beschaidenleich, daz wir in daz vargenant halb phvnt phennig dienen schvllen alle iar an sant Merten tag hintz spitz an alle ir mve vnd schaden, oder tet wier des nicht oder swer die vorgenanten hofstat vnd garten nach vns gewinnet, so get darnach pvrchrechts wandel darauf, als pvrchrechts recht ist in dem lande ze Osterrich. Vnd swas der vargenant her herman der priester van spitz vnd heinrich sein prvder vnd Margret sein swester vnd ier erben des vargenanten dienstes vnd wandel schaden nemen, daz schollen si haben auf der vargenanten hofstat vnd garten. Wir haben auch in daz vargenant halb phvnt phennig geltes aufgeben ledichleichen vnd vnuerchvmbert zv versetzzen vnd zv verchauffen oder geben, wem si wellent, mit vnserm gvetleichem willen vnd mit dez perchherren hant hern Andres zv den zeiten Richter datz Rossatz. Wir lvben in auch den vargenanten gelt auf der vargenanten hofstat vnd gorten ze scherm vnd verantwurten gegen allerlay ansproch an allen iren schaden, als des landes recht ist in Ostereich. Vnd darvber so gib ich der vargenant hainreich der keltinger datz Rossatz zv einer bestetigvnge vnd zv einem woren zevge dier sache disen offen prief versigelten vnd bestetigt mit meinem insigel vnd darzve so sint gezevge fridreich der harlvnch, dvrinch van wegstorf, wolfhart der amman datz Rvgestorf vnd vlrich der Rvster vnd ander erber levt genveg. Diser prief ist gegeben, do man zalt von Christes gepvert drevtzechen hvndert iar vnd darnach in dem aisvndfiertzigistem iar An sant Johannes tag ze svniwenten.

Source Fulltext: OÖUB 6 (Wien 1972) S. 383f., Nr. 379