Wir Nicla von Gotes genaden abbt dez gotzhauzz ze Gersten und der gantz conventt daselbs vergehen, daz der beschaiden Chunrat der Perausch purger ze Steyr und sein mithelfer gewidemt habent und gestifft Got ze lob in selb ieren vorvodern und allen gelaubigen seln zu trost ain ewigew mess di man an underlas alle tag tegleich haben schul entzeit in sand Johannschirchen datz dem Weyer und besunderleich an dem mitichen fruer denn ander tag in der wochen, darum si uns beraits gelts gegeben habent und gentzleich verricht anderhalbhundert pfunt wyenner pfenning in sogetaner mainung, daz wir darum wolbedach mit unserm gu^etleichen willen unserm pfarrer datz Gaflentz der diselben mess von unsern wegen haben schol und verwesen haben gegeben und ausgetzaigt die gueter di hernach geschriben stent fu^er zehen pfunt pfenning gelts auf die di mess gestift ist, Nagelhof Moderlehen Awrlehen daz lehen am pawngarten Gorawslehen Ymriklehen und der Cholpach Fuchslehen auf dem Chirichpu^ehel auf der Strewzzin guet daselbs allen den genanten dienst der von den selben guetern geho^ert ze raihen, es sey traid pfenning swein huener ayr alz man uns daz vormaln gedient hat, daz schol einem pfarrer gevallen fu^er di zehen pfunt geltz und sust chain fadrung nicht, wand stift und sto^er zehent und stewer wandel und allew pezzrung behalt wir uns und unserm gotzhaus ze niezzen so is von alter gewesen ist. Wa^er awer daz sich dhain stos oder ierrung erhueb davon di egenant mess wuerd vertzogen und nicht tegleich folpracht, ez wer von eins pfarrer saumung oder von unsrer amptlewt schuld oder von unsern wegen wie so sich daz fueget, daz selb schu^ell wir ze hant alzpald is an uns pracht wiert wenden und gar richtig machen, und waz versaumt ist erstatten und wider gentzleich erfollen. Geschech dez nicht und daz wir selb oder unser nachchomen saumig darinn wa^eren ob daz selb wuerd mit einer warheit erchundt und erfarn, so schu^ellen di obgenanten anderhalbhundert pfunt pfenning gevallen in daz spital ze Steyr und schullen wir die dann unvertzogenleich wer zu derselben zeit da spitalermaister ist geben und in der gantz und gar verrichten. Tet wir des nicht so hat der selb spitalmaister vollen gewalt uns und unser oftgenant gotzhaws ze Gersten darum ze pfenten und ze no^etten mit unserm guetleichen willen an allez recht wo so er unser hab mag begreiffen, untz daz er der egenanten anderhalbhundert pfunt pfenning gantz und gar von uns gewert wiert und verricht daz wir dhain widerred nicht dakegen haben schullen in dhainen wegen. Daz in daz von uns allez stet beleib und unverchert, daruber zu ainem urchu^end der warhait geben wir in den prief versigelt und bestetigt mit unserm und mit unsers convents anhangunden insigeln. Der prief ist gegeben nach Christi gepu^erd u^eber dreutzehenhundert jar und darnach in dem ains und sibentzkisten jar an unser vrawen tag alz si geparen ist.

Source Fulltext: OÖUB 8 (Wien 1883) S. 542f., Nr. 547