ICH swester Chlar di Pawngartnerynn ze den zeiten priorinn in dem vrowenchlo^ester ze Tulln prediger o^erden vergich offenbar mit dem prief lembtigen und chu^enftigen, das fu^er mich cho^em der erber geistleich her abpt Niclas von Gersten von eins weingarten wegen gelegen ze To^eblinkch an der mittern Ho^echenwort, des anderhalb jewch ist und da man uns jerleich von dient ze perchrecht in dem lesen fu^emfthalben emmer mosts und fumfthalben wienner phenning ze voytrecht und nicht mer, und derselben weingarten ist gelegen u^erpaw und od drew ganczew jar von Hainrich des Schekchen wegen und aller seiner erben da ich mit meinem anwalt mit dem rechten auf gesprochen wolt haben umb daz versezzen perchrecht und voytrecht. Nu cho^em der erber geistleich herr abpt Niclas von Gersten und zaigt uns des vorgenanten hern Hainreichs prief des Schekchen das er mit seinem guetleichen willen und aller seiner erben denselben vorgenanten weingarten dem egenanten abpt Niclasen und dem goczhaus ze Gersten (gegeben hat?) und pat mich vleizzich, das ich im darzue vreyung gib vier ganczew jar, so wolt (er) denselben weingarten widerpringen. das hab ich getan also in der mazz, daz er und alle sein nachchomen mit dem obgeschribenn weingarten fu^erbas allen iern frumen damit schaffen schullen mit verseczen mit verchauffen und geben swem si wellen an alle ierrung. Mit urchu^end des priefs der besigelt ist mit meins vorgenanten swester Chlarn der Paumgartnerynn die zeit priorinn in dem vrownchloster ze Tulln anhangunden insigel und mit unsers schaffer insigel Peter des Puechleins ze einem warn geczeug der obgeschribenn sach. Der prief ist geben nach Christi gepu^erd drewczehen hundert jar darnach in dem drew und sibenczkisten jar des sunntags vor sand Michels tag.

Source Fulltext: OÖUB 8 (Wien 1883) S. 660f., Nr. 658