ICH Wernhart zder zeit amptman ze Weistra und mein hawsfraw mitsampt allen unsern erben wier verjehen, umb daz guet gelegen in der Weng zenegst dem werder pey dem Egelse in Pehaimperger pfarr daz unser rechtlehen gewesen ist von dem ersamen mann Petrein dem Prehafen und von seinen erben, der die manschaft und aygenschafft die er darauff hat gehabt hat ledichleich durich Gots lieb willen und durich seiner und aller seiner vodern und aller gelaubigen selhail gegeben dem gotshaus dacz Ga^ersten, daz wier mit unserm gu^eetleichen willen wolbedacht daz selb guet in der Wenge mit allen den nu^etzen rechten und eren so dazue geho^ert alz wier ez haben inne gehabt, recht und redleich haben gegeben ze chawffen unserm gnedigen herren abbt Niclasen ze Ga^ersten und seinem gotshaus daselbs aus unsrer nucz und gewer ledichleich in die ier umb ain gelt des wier von im gar und gancz gewert sein und verricht so verr, daz wir fu^erbaz nichtz mer auf daz selb guet ze sprechen von der selben lehenschaft haben schu^ellen oder sust weder wenig oder vil. Nu hat uns der egenant unser lieb herr abbt Niclas die besunder genad getan und hat uns daz selb vorgenant guet in der Weng herwider verlihen ze vreysecz und ain hausraum darauff gegeben in den rechten und gewonhait alz sein gotshaus hat von alter auf andern seinen gu^eetern und gru^ennten in sogetaner maynung, daz wier im und seinem obgenanten gotshaus ze Ga^ersten von demselben vorgenanten guet in der Weng jerleich dienen schu^ellen ain pfunt wienner pfening ze zwain ta^egen in dem jar, ain halb pfunt an sand Jo^ergen tag und ain halb pfunt an unsrer vrowen tag zu der dienst zeit unverczogenleich und nich mer, ez wer dann alz vil daz ainer gewalt stewr an in oder an sein goczhaus begert wurd, von wem daz wa^er oder daz dem gotshaus von anderrlay not hilff durfft gescha^ech wie so die genant wa^er, darinne schu^ellen wier im an alle widerred nach unserm vermu^egen mit ainer stewer geholffen sein und mitleydunt alz ander des gotshauzz holden von so^elhen gu^eetern. wer auch daz wier unser hausraum auf dem selbigen guet durich unsrer notdurfft willen mu^eezsten oder wolten verchumbern iz wer mit verseczen oder mit verchauffen, wann daz wer daz schol geschehen mit unsrer herschafft dacz Garsten gunst und wizzen nach desselben goczhaus rechten und gewonhait. Daru^eber zu ainem urchu^end der worhait daz daz alles also beleib stet und unverchert, geben wier ich obgenanter Wernhart und all mein erben den prief versigelt mit der zwayer erbern mann anhangunden insigeln Petreins des Hinterhollczer und Ulreichs des Pawzz, darunder wier uns mit unsern trewen verpinten stet ze haben allez daz hievor stet an dem prief geschriben wan wier selb nicht aygner insigel haben. Der prief ist geben nach Christi gepu^erd u^eber dreuczehenhundert jar darnach in dem drew und sibenczkisten jar des ertages in den veyrtagen ze pfingsten.

Source Fulltext: OÖUB 8 (Wien 1883) S. 648ff., Nr. 650