ICH Lewtwein der Schikch purger ze Steyr und mein hausfraw und mit sampt uns all unser erben wir verjechen umb daz guet genant an der Oed gelegen pei dem O^edgraben in Gerstner pfarr daz unser vreys ledigs aygen ist, daz wier daz selb guet mit allen den eren rechten und nu^eczen di dar zu^e geho^erent oder da von becho^emen mu^egen, haben gegeben ze chauffen dem erbern geistleichen mann hern Ulreichen dem Chumberlein conventtprueder indem gotshaus ze Garsten umb vier und zwainczk phunt wienner phenning der wier von im gancz und gar gewert sein und verricht, di im von ainem. seiner besundern freunt in betrews weise wol getraws namen sind ingeantwurtt und geben ze behalten, und haben wier im daz selbe genant guet an der O^ed geben und geantwurtt aus unserr nutz und gwer alz wir ez inne gehabt haben in di sein also, daz wier fu^erbaz chain ansprach nicht mer dar auf haben schullen in dhainen wegen. Und schu^ellen auch desselben gůetes sein gewer fu^er all ansprach sein, wo im des not und durfft geschiecht nach dem landes recht ob der Enns und allz freys aygens recht ist. Ta^eten wier des nicht, na^em er dar u^eber der vorgenant her Ulreich dhainen schaden mit recht der selben gewerschafft den er pey seinen trewen an ayd mag gesprechen an recht er selb oder wer mit dem prief fu^er chu^empt und den inne hat mit seinem willen, denselben schaden wie so der genant ist allen schullen wir in aller sachh gancz uud gar ausrichten und wider cheren an all unser wider red, und schullen si daz haben dacz unsern trewen und dar zue auf allen unser hab di wir haben ez sey varend guet oder gru^enntt, und schu^ellen desselben schadens da von gentzleich becho^emen wo sis beraihen mu^egen, so si aller liegst mu^egen wir sein lembtig oder tod, daz wier nicht wider schu^ellen da kegen weder reden noch tuen in dhainen wegen. Dar u^eber zu ainem waren urchu^end gib ich obgenanter Lew^otwein der Schikch den prief dem vorgenanten hern Ulreichen oder wer den prief mit seinem willen oder geschafft inne hat versigelten mit meinem anhangunden insigel, und sind des zeug mit ieren insigeln in an schaden di erbern Perchtolt an dem Aygen richter ze Garsten und Hainreich der Felba^er purger ze Steyr. Der prief ist geben nach Christes gepu^erd drewtzehenhundert jar in dem vier und sybentzisten jar an unser vrowen tag zu der liechtmezz.

Source Fulltext: OÖUB 8 (Wien 1883) S. 676f., Nr. 671