Wein(hart) Thewrwanger Stifften. Abbt Niclas vnd der Conuent zu Gersten verschreiben sich, empfangen zu haben von Weinharten dem Thewrwannger, Burger zu Steir die nach gemelten gueter: den Hof dacz dem Dorf vnd das Lehen vnd die Hofstatt vnd die Mul in Sand Michels Pfarr. Jtem ain gut genant dacz nicklein an der Hueb in Weistracher Pfarr. Jtem ain gut genant an der Hueb. Jtem ain guet genant dacz Grueb. Jtem ain guet genant im Weingarten in Hädershofer pfarr, Jtem ain guet dacz obern wolfarn im aigen, Jtem ain Hof genant der Osterman, Jtem zway gueter genant an der wyß dacz Symon, vnd dacz petrein, Jtem ain gut genant dacz Wigkenstorff. Jtem ain Hof genant dacz vrtail in Wolfarer pfarr, Jtem ain guet genant, dacz Weichselpam in Khematter pfarr, Mit welchen gueter der thewrwannger gestifft ewiglich den goczdienst in der pfarrkirchen, durch ain yeden pfarrer Conuentbruder, zu Steir ze halten: von erst alle tag ain gesungen Mess von vnser lieben frawen, in der weiss vnd ordnung, daz mit sambt dem tag zu der Mess geleitet werde, vnd dar nach sol man die Mess anheben ze singen, nach der Lewt zukunfft, so man fruest mag. Jn der mess, so(l) geschehen ain gemain gedechtnuß, Lebendiger vnd todter mit der offen peicht, vnd dez abentz ain gesungen abentczeit, es sey ain veschper oder Camplet, als ze Zeit gewöndlich ist vnd die Zeit vordert. Er sol auch all pfincztag, ze abents nach der vesper oder Camplet, oder sein gesellen an seiner statt geen, Weinharten des Tewrwannger Cajpellen mit dem Respons homo quidam fuit vnd daselbst, da singen den Verß vnd das gloria. vnd ain Collecten, dar auff sprechen, gotzleichnam zu Eren, vnd von demselben gesang, sol der pfarrer seinen gesellen geben an vnser frawen tag zu der dinst zeit VJ [R] d, dem Schulmaister LX d; Penfal in das Spital den armen Leiten LX d. Von der Vesper oder Complet oder Respons den vorgenanten armen leuten XXIIIJ. d beschech das nit, mit gewissen, sol Richter vnd Rat zu Steir das ainem abbt zu Gersten kundt machen, daß er den pfarrer dar zu nöt, alß offt Er versessen hat. Wär aber daß Abbt das nit thun wolt, so sol Richter vnd der Rat, Burger ze Steir ainen Abbt nöten, auff aller seiner Hab, wo sy die ankomen auff wasser oder Lannd, zc. so lang vndz die pfenning all gegeben werden, als manig meß, vnd ander gotzdinst versambt ist. Mer haben der Abbt vnd Conuent empfangen von dem genanten Thewrwanger zway gueter, Aines genant am Drischelperg, das ander die Jägerhueb in Gästner pfarr, der mainung, dass ain pfarrer zu Steir, in gotzleichnam wochen, an welichem tag es im fueglich ist, Gotzleichnams Hochzeit begen sol, mit zwelf priestern, in aller der mass mit dem gang, auff das Haws, in das Spital, vnd herwider durch die Statt, ob es an dem Wetter gesein mag, als an dem Rechten tag, vnd Ordnung begangen wirdet. Wär aber das der pfarrer ynndert daran Sawmig, so sol Er all nucz die gefallen mügen von den zwain guetern, in ainem Jar geben, mit des Richters wissen wer Richter ist zu Steir, den Siechen in das Spital daselbs, ze Steir. Tät er des nit, sol Jn der Abbt zu Gersten dar zu nöten. Tät der Abbt das auch nit, sol der Richter vnd der Rat, den Abbt nöten als oben geschriben ist. Die gemelten abbt vnd Conuent zu Gersten haben abermalen ain guet empfangen genant der Truchsenhof in Sierninger pfarr, Jn solcher Beschaidenhait, das der pfarrer zu Steir sol alle wochen vnuerzogenlich außrichten drey Meß in seiner Cajpell, vnuerzigen alles Gotzdinst, der sonnst in der pfarr volpracht sol werden, als der von alter her komen ist. Penfal, So der pfarrer an den drein Messen säwmig wär, von ainer yeden versambten meß verfallen sein XlJ d den Siechen in das Spital ze Steir. Tät er des nit, sol Jn der Abbt dar zu nöten. Geschech das auch nit, so sol der Richter vnd der Rat den Abbt nöten, als oben bemelt ist zc. Es sol auch der obgenant pfarrer zu Steir, die gueter alle Jnnhaben mit allen Rechten vnd nüczen, zc. wie es dann der brief clerlich auß weißt. . Vnd der Thewrwannger hat auch dem in sonderhait ain pessrung geben in die Abbtey, lediglich IJ Pf. d geben auff dreyen guetern, auff aim gut, der puster, in Gerstner pfarr, vnd auff zwain genant dacz Schachen, in Khematter pfarr, das er dem pfarrer lassen sol, di nücz, von Stifft, vnd von Stör vnd von aller Handlung vnnd besserung. vnd dar zu, ob ain pfarrer nicht vbriger nucz von dem Truchsenhof empfieng, die Er leicht auff die drey Meß, nicht leget, die selben nucz sol er haben zu pesserung allem Gotzdinst zc. mit merern außzaigen des briefs. vnder des Abbt vnd Conuent Jnsigl Anno zc. 1379 an vnser frawen Verkündigung tag. brief bei der Kirchen, dabej ain geschäfft vom Theurwanger vnd ain bestatbrief von ainem Bischof von Passaw. So im "Vermerkcht ain Außzug aller Stifft vnd brief, So ain yeder pfarrer zu Steir, hallten vnd volpringen lassen sol, dabej auch die Gueter, damit die Gotzzeer gestifft werden."

Source Fulltext: OÖUB 9 (Wien 1906) S. 600-603