ICH Dorothea Tomans des Arbaitter seliges (sic) witib vnd mit sampt mier all mein Erben, wie dy genant synd, wir vergehen an dem gegenbu^ertigen prief vnd tün chvnt allen Laüten, dy den prief ansehent, horent oder Lesent, Daz wir mit wolbedachtem mu^et mit Rat vnd weyfu^eng Erber Lavt zü der zeit, do wir es mit Recht wol getün mochten, Recht vnd redleich ze chaüffen haben gegeben zv^e einem Rechten chaüff dem Erbern weschayden Helmlein dem Anhanger vnd seinr Haüsfrau vnd allen seinen Erben, wie dy genant find, vnser gu^et vnder der Letten genant gelegen vnder sand Jacobs Leyten mit allen den Ern, Rechten vnd nu^eczen, dy dar zv^e geho^erent vnd auch da von wecho^emen mu^egen ze holcz ze Veld, ze wayd, ze wismad, versu^echt vnd vnuersu^echt, aus vnser nücz vnd gwer in ir nücz vnd gwer mit herren hant vnd mit aller stet, vmb ein gelt, des wir von in gancz vnd gor verricht vnd gewert sein an allen schaden mit der weschayden, daz ich noch all mein Erben nach dem obgenanten güt nymer mer dhain ansprach schüllen haben noch gewinnen weder mit Recht noch an Recht, vnd verczeihen vns auch des ganczleich vnd gor mit dem offen prief vnd schol auch ich obgenantev Vraü Dorothea mit sampt mein Erben des obgenanten güts ir Recht gewer vnd fürstand sein für mich vnd für mein Erben ze hof, ze tayding, wo in des nöt vnd dürft geschycht vnd also chauffes Recht ist in dem Land ob der Ens, vnd gieng in an der gewerschaft icht ab, was sy des schaden nemen mit Recht, wie der schad genant wu^erd, daz er oder seinr Erben ainr gesprechen mocht pey sein trevn an ayd vnd vngeswo^ern vnd an alles Recht, Den selben schaden mit sampt dem Haüptgüt schüll wir in ablegen vnd wider chern gancz vnd go^er vnd schu^ellen sy daz haben dacz vns vnd vnsern trevn vnd dar zv^e auf all vnser hab, wo wir dy haben auf wazzer oder auf Lant, versu^echt vnd vnversu^echt, vnd da von wechömen Haüpgu^ets vnd schadens, als sy nächst vnd pest mügen mit vns vnd all vnser Erben gütleich willen vnd wort an allev chlag vnd fürbot, wir sein Lebentig oder Tod. Daz dem obgenanten Helmlein dem Anhanger vnd allen sein Erben dy sach vnd tayding von mier vnd allen mein Erben also stet vnd vnverchert weleib, dar über gib ich in den offen prief versigelt (mit) meins Lieben Vater Götschalichs von Hanveld anhangvndem jnsygel vnd zv^e einr pezzern sicherhait vnd zevgnüzz mit des Erbern weschayden Petreins des Hinderholczer, phleger ze steir anhangundem jnsygel, mit des hant dy wandlu^eng geschehen ist vnd jrev jnsigel an den prief habent gelegt vleizzich durich meinr pett willen in an schaden, vnder der jnsygel verpint ich mich mit sampt meinen Erben mit vnsern trevn alles das stet zehaben, daz vor an prief geschriben stet, wan wier aygens jnsigels nicht gehabt haben zv^e der selben zeit. Der prief ist geben, do man zalt von christi gepürt drevczehen hundert jar, dar nach in dem Naün vnd sybenczgisten jar des Mentags nach sand Erharts tag.

Source Fulltext: OÖUB 9 (Wien 1906) S. 562-564