Ich Gundakcher der Tu^emmair vnd ich hainrich der vorster vnd ich Vlreich von Talgenberg vnd hainrich von steting veriehen vnuerschaidenleich offenbar an disem brief allen den, di in sehent oder ho^ernt lesen, daz wir porg sein worden Rudolf von Winchelham vnd seinen Su^en chunrat gegen vnserm lieben herren hern abt Christan dez Gotshaws daselbs vnd dez Conuentz ze Ma^ennse vmb den hof ze Moshaim, der da haisst der lawhöf, den er jm lassen hat ze pawmansrecht, den er vns(!) alle jar dienen sol nach genaden, die er an vns(!) vindt. vmb dazselb verhaissen wir jm ich vorgenanter gundakcher vnd die obgenanten porgen, di nach mir verschriben stent, daz im der dienst dauon geuallen sol an alz geua^er. Vnd war auch, daz er den vorgenanten Rudolf vnd sein Sun Chunrat verchern wolt auf demselben hof, so hat er chainerley recht noch ansprach hintz dem hof nicht ze sprechen, daz daz sta^et vnd vnzebrochen weleib, gib ich jm vorgenanter Gundakcher der Tummair disen brief meinem herren abbt Christan vnd dem gotshaws ze Ma^ennse versigelten zu einem worn vrchund mit meinem insigel, darhinder verpinten wir vns vor genante porgen mit vnsern trewen an alz geua^er, wann wir aigen insigel nicht haben, daz ist geschehen, do man zalt von Christi gepurd drewczehen hundert jar vnd darnach in dem zway vnd vierczkisten Jar an vnser frawentag, alz sy geporn ward.

Source Fulltext: OÖUB 6 (Wien 1872) Nr. 420, S. 425