Ich Hertel vnd ich Ott di Inderspekchen, vnser hawsfrawen vnd vnser paider erben wir veriehen vnd tuen kund offenbar an disem brief allen den, di in sehent oder ho^ernt lesen, daz wir vns mit vnserm lieben genadigen herren hern Christann abbt ze Ma^ennse vnd mit allem seinem conuent vnd mit allen seiner stift dez chlosters vnd mit allen den, di zw dem gotshaws geho^ernt des chlosters ze Ma^ennse ir lawt vnd ir guet gar vnd ganczleichen bericht haben vnd besunderleich vmb den hof ze Ga^enakcher vnd vmb alle ansprach, di wir hintz meinem vorgenanten herren vnd hintz seinem gotshaws gehabt haben. Wir luben in auch mit vnsern trewen an aides stat, daz wir furbaz chaynerlay ansprach hintz meinem e genanten genadigen herren noch hintz dem gotshaws noch hintz allen den, di zw dem gotshaws geho^ernt, wie di genant sein, gaistleich oder wertleich nymmer mer haben sullen noch gewinnen an allez geua^er. Wir veriehen auch des geltz, damit wir verricht sein, daz man vns daz gar vnd ganczleich verricht vnd gewert habent an allen vnsern schaden. Wir loben in auch mit vnsern trewen an aydes stat allez daz sta^et ze behalten, daz oben an dem brief geschriben stet, Vnd wo in daz jndert v^ebervarn oder v^ebergriffen wurd, so sullen wir v^ebersait sein vnd sol sich mein herr her Hiltprant von Ramsperch vnd her Fridreich von Praitenekk vnd her Ludweig auf dem Stain vnser todveint sein vnd sullen sich di dann stellen nach vnserm leib vnd nach vnserm gu^et vnd sullen sy des furbaz vnengolten sein gein vns vnd gein vnsern hawsfrawn vnd gein allen vnsern erben vnd gein allen vnsern frewnten an alles geua^er. vnd daz daz meinem egenanten genadigen herren, seinem conuent vnd allen den, di zw dem gotshaws vnd auch zw der stift geho^ernt, sta^et vud vnzebrochen beleib, geben wir in disen brief versigelten mit der dreyer erberiger mann insigel herren Hilprantz von Ramsperch vnd hern Fridreichs von Praitenekk vnd hern Ludweigs auf dem Stayn, di wir mit vnser vleissigen pet daruber gepeten haben in vnd iren erben allen an schaden, dar vnder wir vns verpinden mit vnsern trewen an aydes stat, allez daz sta^et ze behalten vnd ze volfu^eren, daz an dem brief verschriben stet, dez sind zewg hainreich der Vreya^er, Chunrat von Law, vlreich der vllchouen vnd ander erber lawt genug, daz ist geschehen zw sand nicla bey passaw, do man zalt von Christi gepurd drewczehen hundert vnd in dem acht vnd vierczigisten jar an sand Marteins abent.

Source Fulltext: OÖUB 7 (Wien 1876) Nr. 80, S. 79f.