Ich Fridreich Chelner genant der Otzdorfer, mein hawsfraw und all unser erben verjehen, daz wir den garten der gelegen ist ze Puechperg der unser lehen ist gewesen von dem gotshaus ze Ma^ennsee ze chauffen haben geben dem ersamen herren abbt Hainrich daselben und seinem gotshaws hin wider umb ein gelt dez er uns gar und gantz gewert hat, also daz wir chain ansprach furbaz nymmer mer darnach haben sullen. daz dem vorgenanten herren und seinem gotshaws der chauf sta^et und unverchert weleib geben wir in den brief versigelten mit dez erbern manns Lienhartz dez Freinperger anhangunden insigel, wan wir ze den zeiten nicht aigens insigels gehabt haben. Daz ist geschehen do man zalt nach Christi gepurd drewzehen hundert jar darnach in dem drey und sechczigistem jar an sand Katrein tag.

Source Fulltext: OÖUB 8 (Wien 1883) Nr. 153, S. 159