Venerabilibus civibus nec non toti communitati in Weyttra utriusque sexus ceterisque plebesanis pro temporibus presentibus et futuris||
ordinis seraphici patris nostri francisci benefactoribus devotissimis frater Johannes Capistranus eiusdem ordinis minimus et indignus||
ac reverendissimi patris generalis in omnibus partibus ultramontanis quo ad fratres ad (sic !) observancia nuncupatos inmeritus vicarius ||
generalis. Cum oracionum suffragio salutari omnium incrementa virtutum quamvis ex karitatis debito omnibus teneamur illis tamen longe ||
amplius obligamur quorum dileccionem certis beneficiorum indiciis frequencius experimur proinde vestram devocionum senceritatem attendentes ||
quam ad nostrum et prefati patris nostri francisci geritis ordinem veluti clara experiencia cognovi dignum putavi et divine acceptabilia ||
voluntati ut ab ipso ordine prerogativam senciatis spiritualium graciarum verum quia nudi temporalibus bonis caritatis vestre subsidiis ||
dignam reprendere vicem nequiquam temporaliter valemus spiritualibus nihilominus beneficiis ut in vestris aput dominum deum nostrum fundamus ||
desideriis compensare spiritualiter affectamus ea propter ego qui licet indignus curam fratrum minorum de observancia nuncupatorum et ||
sororum minorissarum sancte Clare sew sancti Damiani de observancia nuncupatorum et eorum religiosorum de penitencia ordinum in partibus ||
ultramontanis habeo generalem vos venerabiles cives nec non totam communitatem civitatis supradicte utriusque sexus ceterosque plebe- ||
sanos familiares benefactores presentes pariterque futuros nec non et animas vestrorum defunctorum et omnes pro quibus intenditis ad confraternitatem ||
nostram et ad universa et singula nostre religionis suffragia in vita recipio pariter et in morte plenas vobis participaciones ||
omnium carismatum et spiritualium bonorum videlicet missarum oracionum suffragiorum officiorum divinorum ieiuniorum abstinenciarum et disci- ||
plinarum penitenciarum peregrinacionum inspiracionem predicacionum leccionum meditacionem contemplacionum observanciarum et devocionum ||
et omnium aliorum spiritualium bonorum tenore presencium graciose conferendo que perficiens nostros et dictorum ordinum sorores nec non aliorum ||
de observancia ac penitencia ordinum sive tertio ordine beati francisci in partibus citramontanis degentes operare et acceptare digna- ||
bitur clemencia salvatoris addens insuper de dono et gracia singulari quod cum divine placuerit voluntati de exilio instantis ||
miserie vos vocare vesterque obitus multo annuente domino tempore differendus nostro fuerit capitulo nunciatus ideo volo ut pro vobis ||
fiat officium quod pro fratribus vestris defunctis recitatis ibidem annuatim ex more per totum ordinem fieri consuevit valeat feliciter ||
vestra devota et fervens caritas in Christo Iesu domino nostro in eternum. Amen. Datum Weyttra supradicta. In die sancti Kalixti pape ||
anno domini millesimo quadringentesimo quinquagesimo primo etc. ||
Frater Johannes supradictus manu propria subscripsi