Clemens² episcopus, servus servorum Dei, dilectis filiis priori et conventui domus heremitarum in Paden ordinis sancti Augustini, Pataviensis dioecesis, salutem et apostolicam benedictionem. Cum a nobis petitur, quod iustum est et honestum, tam vigor aequitatis quam ordo exigit rationis, ut id per sollicitudinem officii nostri ad debitum perducatur effectum. Sane petitio vestra nobis exhibita continebat, quod Henricus de Potendorf laicus et Chunegundis eius uxor, Pataviensis dioecesis, de salute propria cogitantes et cupientes terrena in caelestia et transitoria in aeterna felici commercio commutare, ius patronatus, quod tunc habebant in capella beatae Mariae virginis in Paden, dictae dioecesis, domui vestrae contigua, quam eorum progenitores de bonis propriis de consensu loci dioecesani fundaverant, et omne ius, quod in eadem capella eis quomodolibet competebat, pro animarum suarum remedio vobis, quibus, ut asseritis, ex privilegio speciali Sedis Apostolicae proprium in communi licet habere, ad id venerabilis fratris nostri Wernhardi episcopi ac etiam dilectorum filiorum capituli Pataviensis accedente consensu, pia et provida liberalitate donarunt, prout in patentibus literis inde confectis ipsius episcopi sigillo munitis plenius dicitur contineri¹. Nos itaque vestris supplicationibus inclinati, quod super hoc pie ac provide factum est, ratum et gratum habentes, id authoritate apostolica confirmamus et praesentis scripti patrocinio communimus. Nulli ergo omnino hominum liceat hanc paginam nostrae confirmationis infringere vel ei ausu temerario contraire. Si quis autem hoc attentare praesumpserit, indignationem omnipotentis Dei et beatorum Petri et Pauli apostolorum eius se noverit incursurum. Datum Pictavis, Non. Maii pontificatus nostri anno tertio.

Source Fulltext: MAURER, Augustiner-Eremiten Baden (=FRA II/89, Wien 1998) S. 82-83.