Wir Laurentius, von Gotts gnaden abbt unnser Lieben Frawen gottshaus in Gottbeig³, und wir der convennt gemayniklich daselbst beckennen fur uns und all unnser nachkomen offennlich mit dem brieff, das wir mit zeittlichen ratt auf ain rechten widerkauff recht und redlich verckaufft und ze kauffen geben haben, verckauffen auch wissenntlich in krafft des brieffs vier mutt getraid, so auf den gůtern unnsers getraidzehents umb Pruck auf der Leytta und Petronell +nicht das ergist+^a jarlich gevellt, oder fur yeden mutt drew lb. phening dem ersamen geistlichen brueder Wolfganngen, diezeit prior, und dem prior und dem convennt unnser Lieben Frawen gottshaus in Paden augustiner orden und allen iren nachkomen umb zbaihundert ungrische gulden, dy wir von in beraitt emphanngen haben, doch mit ausgenomen wortten, das wir nůn furbas den egenanten prior, seinem convennt und allen iren nachkomen dy bestymbten vier mutt traid oder aber für yeden mutt drew t d ausrichten und in dy jarlich zw sannd Michels tag in ir gottshaus gen Paden anttburtten und raichen sullen und wellen an ir mue und darlegen, und haben uns das vorbehalden, das chain losung von datum des brieffs dy ersten drew jar an uns ervordert soll werden. Darnach furbas in yeglichem jar sol und mag yeder tail dem anndern solh ckauff oder ablösung und (sic!) dy benanten zbaihundert ungrischen gulden und nicht höcher anpietten und ain quottember darvor ze wissen thůn. Des soll dann ain tail dem andern stattůn, doch wollen wir dennoch dy benante gůllt desselben jars, so der widerckauff oder ablosung geschieht, dem yetzgemeldten prior und seinem convennt raichen und widerfaren lassen, und sy sullen uns jarlich mit ainer quittung solhs innemen versorgen angever. Wär aber, das wir des als oben begriffen ist nicht tätten, des sy schaden nemen, denselben schaden sullen wir und wellen in oder ainem aus iren anbälden irs ordens, der uns mit dem brieff ermont, abtragen, widerkeren und widerlegen treulich und ungeverlich. Es ist auch beredt worden, das sy uns dy gegenburtig verschraibung nach den widerkauff oder ablosung widerumb zu unnsern hannden an widerred geanttburtten sullen. Dy soll dann gantz ab und tod sein und chain krafft mer haben treulich und ungeverlich. Geben^b nach Christi gepurd viertzehenhundert und darnach im funff und sybentzigisten jaren (sic!) an suntag vor sannd Matheus tag des heiligen zweliffboten und ewangelisten.

Source Fulltext: MAURER, Augustiner-Eremiten Baden (=FRA II/89, Wien 1998) S. 261-262.