Allerdurchleuchtigister, großmechtigister kunig, allergnedigister erbher unnd lanndsfurst! Ewr kunigklichen mt. wünschen wir von dem allmechtigen Got, unnserm himlischen vatter, sellige wolfart unnd das ewig leben unnd geben hienach e. ku. mt. in allerunnderthenigister gehorsam volgunds unnser diemuetigs anlangen unnd bitlichs begeern gnedigelichen und vatterlichen zu vernemen. Furnemlich aber, allergroßmechtigister kunig, so hat der almechtig Got den erwirdigen herrn Ambrosien Stogker, prior alhie augustiner ordens, am freitag frue vor Magdalena, das ist der xxte tag July¹, nach seinen gotlichen willen aus diser welt genomen, dem Got und uns allen gnedig sein wolle. Also dasselbig closter und wirdschafft on ainigen ordensman und conventbrueder gelassen und niemands anders dann sein weinschenckh² bis auf dise stundt darinnen wont unnd die gemelt wirdtschafft versehen thuet, wie wir dan solchs e. ku. mt. loblich cantzler unnd regenten der notturfft nach grundtlich angezaigt haben³. Dieweil dann vor jaren die gehert closterstifft unnd derselbig gotzdiennst durch in den prior unnd ansechlichs convent verricht unnd aber jetzt ain lannge zeit unnd vil jar her den merern tail nur allain angezaigten gotzdiennst und hauswirtschafft versorgt und versehen hat unnd nichz weniger aller einkomen, rennt, zinß unnd gilt, alles wie zuvor der gantz convent beieinannder gewesen, genossen unnd eingenomen, zu dem, das er sich des unmässigen weinschenckhens, teglicher gasstgebschafft unnd anderer burgerlicher handtierung mer dan vor angemasst und underfangen hat, alles zu grosem auch merckhlichem abgang, nachtail und schaden unnser und des armen, zwyer verdorbnen stetlein⁴, unnd demnach wie gemelt der loblich gotzdienst unnd stifft unausgericht beliben, das kem^a bey weillen in ainer ganzen wochen ain meß gehalten worden, wie wir unns dessen in verschinem achtundzwaintzigisten jar unnser hohen notturfft nach gegen e. ku. mt. stathalter und regierung beschwert⁵ und noch in rechten unentschaiden schweben⁶, so ist aber, allergroßmechtigister kunig, e. mt. gnedigist erinnert, wie in der ersten turgkischen anfechtung und verwuesstung das beruert e. ku. mt. arm stetlein sambt der ganntzen burgerschafft und innwonern unnder allen fleckhen in Osterreich an guet, leib, weib unnd kindern (wie wir dan solhes zuvor e. ku. mt. nachlengs in ainer suplication den ausstandt der steurn belangendt glaubwirdig angetzaigt haben) on^b allermaisten zerslaipft, verderbt unnd gar ausgebrent worden. Darunder unnser arm und ungestifft spital auch zu poden gangen unnd verdorben, dann wir aller erst widerumben mit der hilf des almechtigen unnd unnser armbuet ain claine, arme wonung zuegericht unnd etlich weingarten zum paw gebracht, davon also etlich personen, als weit sich derselbig genieß unnd empfang erstreckht, unnderhalten werden. Uber das zaigen wir e. ku. mt. in aller gehorsam und underthenigkait an, das wir auf gnediger beratslahung und vorwissen unnserer gnedigen herrn e. ku. mt. kriegsrete und camer das arm verdorben stetlein unnd sonderlich die pfarrkirchen dasselbst zu bevesstigen unnd zu der defennsion unnserm clainen vermugen nach zuezerichten im werch sein unnd zum tail schon etlich gemewr zu der gegenwär mit unnserm darlegen aufgefuert, auch demselben graben erweittert haben. So ist in der warheit aber unnser armuet unnd verderben so hoch unnd groß, das wir solhe angefangne gebew unnd arbait in solher eyl zu verrichten nit vermugig sein unnd sodann, allergroßmechtigister kunig, der vilbemelt prior mit tot verganngen, auch das closter und stifft bis auf dise stundt zu frembder handt gelegt unnd kain ordennsman darinnen ist, wie dan der brueder und ordensleut abgang nit allain bei unns, sonnder auch andern iren clostern mechtig erscheint und gar selten zwen beieinander hausen. Demnach so bitten wir e. ku. mt. durch Gotes willen in aller undertheniger gehorsam, e. ku. mt. geruechte unns und unserm armben ungestifften spital so gnedig ze sein unnd die gemelt closter, stifft, wirdschafft unnd irem einkomen den armen unnsern spital vatterlichen zu aignen und genedigelichen vergunen, da dan in Got wil angeruerter gotzdiennst pessers unnd merers ausgericht, auch in kain andern weg zu versteen, dann das es allain ad pius (sic!) usus den haußarmen unnd bei unns vil verdorbnen personen zu der glori des almechtigen Gotz unnd der seelen hail on ainigen aignen nutz fideliter gebraucht und verricht werden solle, auch unnser angefangte gebew zu der defension desster statlicher zuezerrichten unnd sein enndt erraichen muge, damit wir unns in der zeit der kriegsnot mit weib, kindt, eer unnd guet vor dem veindt erretten mochten, unnd wollen umb e. ku. mt. vatterlich genad und angetzaigte pietanntz ewig tannckhpar sein unnd mit schuldiger pflicht unnd underthenigkait mit unnserer leiben gehorsamlich verdiennen. Thuen unns dem allem nach sambt unnserm verdorben unnd ungestifften spital e. ku. mt. Unnderthenigelichen bevelhen, e. ku. mt. underthenigiste, gehorsame N. richter, rete, die arm gemain der stat zu Paden.

Source Fulltext: MAURER, Augustiner-Eremiten Baden (=FRA II/89, Wien 1998) S. 282-284.