Ich Ullreich Purckhel púrger zw Lewbs¹ und ich Angnes seyn hawsfraw und all unnsser eriben unverschaidenleich, wir veriechen und tun kund offenleich mit dem brief allen, den er furkumpt, die nun lebent oder hernach khumftig werdent, das wir nach rát und gúnst aller unnsser eriben und unsser nachsten pesten freunt zw der zeit, do wir das mit recht woll getún machten, recht und redleichen zw khawffen gegeben haben zway phunt Wienner phenning gelts denn erbern und weysen, dem rat, und der ganttzen gemayn der stat zw Zwetel und allen iren eriben und nachkómen zw dem spitall do selbigs umb sechczechen phunt Wienner phenning. Der wir gantcz und gar gericht und gewert seyn zw rechten tégen an all scheden. Wir haben in awch die obgenanten zway phúnt gelts erstatt auf unnssern hoff, der gelegen ist in dem Obern Aygen ze Lewbs gegen Hannsen des Poschen hoff uber, ledig und unverkhúmert, davon man dient zw sannd Michels tag fumfczechen phenning zw púrkhrecht und nicht mer dem erwirdigen herrén Maister Ulreichen von Passaw, pharrer zw Lewbs, und seinen nachkomen, und zw pesser sicherhait haben wir zw dem obenanten hoff versatczt drew virtaill weingartęn, die gelegen sind an dem Khótmansperig zenachst des Iosten weingarten, davon man ierleichen dient funf phenning ze púrkhrecht und nícht mer zw sand Michels tág dem erbern weysen Niclassen dem Sweller, die zeit der hawer zechmaister zw Lewbs, oder wer do selbs der hawer zechmaister ist oder wirt. Wir sullen in awch, oder wer uns mit ir(e)n gútleichen willen an ir stat von des obenanten spitalls wegen ermant, die obgenanten zway phunt wienner gelts ierleichen raychen an sand Merten tag zw dem spitall gen Czwetel herren Iorigen dem spitallermaister oder wer nach ym do selbs spitallmaister ist oder wirt. Teten wir des nicht, so sullen wír in das pessern und verwandeln, als grúntrechts und purkhrechts recht ist in dem lannde zw Osterreîch, und wann wir in versitczen dienst oder wanndel oder des vor seyn an ir(e)n willen, so schúllen sew sich des obgenanten hoffs und weingárten underwinden mit allen rechten und núczen, wenn sew wellent, als lang undtzt das sew dienst und wandel gancz und gar davon wekoment, das ist unsser gútleicher will an all unsser widerred. Awch habent sew uns dew gnad getan, wenn wir die obgenanten sechczechen phunt phenning und die obgenanten zway phunt dienst gehaben mugen, die wellent sew von uns nemén albeg zw sannd Mertens tag und zw dhaynner zeit mer in dem iar, und wellent uns unsser hoff und weingarten wider ledig lassen angéver. Dieweill aber des nicht geschiecht, so schullen wir der egenanten zwayer phunt gelts irr rechter schermer und gewerner seyn fúr all ansprach, wo in des not oder durft geschiecht, als gewanhait und des landes recht ist ze Osterreich. Gieng in aber daran icht ab mit recht, das schullen wir in alles awsrichten an all ir mue und scheden, und schullen sew auch das haben daczt aller ander unnsser hab, die wir haben oder gewinnen in dem lannde zo Osterreich oder wo wir die haben, und mugen hawptgút und scheden davon wekomen, wie in das aller pest fwegund ist, das ist unsser gúetleicher will an all unsser widerred und hindernuzz. Mit urkund des bríeffs, denn wir ich obgenanter Ullreich Pwrkhell, púrger zw Lewbs, und ich obenante Angnes seyn hawsfraw geben fur uns und fúr all unnsser erben, alles das war und stet ze halden und ze volfueren, das an dem brief geschriben stet, wesigelt mit des erwirdigen herren Maister Ullreichs von Passaw, pharrer zw Lewbs, anhangunden insigel, und wann ich vorgenannter Niclas Sweller, diezeit zechmaister der háwer zech zw Lewbs, nicht insigel gehabt hab, so hab ich gepéten denn erbern Hannssen den Ployschlein, purger ze Lewbs, das er seyn insigel an meiner stat der obgeschriben sach ze zewgnuz an den brief gehangen hatt, im und allen seinen erben an schaden, der geben ist nach Kristi gepúrd virczehenhundert iar darnach in dem fumfczechenten iar an sand Pertelmes tag des heiling zweliffpoten etc.