Wir Albrecht von gotes gnaden herczog ze Ósterreich, ze Steir, ze Kernden und ze Krain, markgraf ze Merh(er)n und grave zu Tirol et. bekennen, daz wir haben angesehen die merkleich darlegung so unser getrewn lieben .. unser burger dacz Zwetl in disen leuffen mit gepaw und zurichttung unserr stat daselbs habent getan und in kunftigen zeiten tún sullen, und haben in dadurch und von sundern gnaden gegunnet und gunnen auch wissentleich mit dem brief den statgraben daselbs und den weyer dabey mitsampt den vischen, die yecz darinn sind, ze nuczen und ze niessen zu írn und der stat notdurften und hinfur allweg zu besetzen und die visch daraus ze vischen, wenn und wie offt in das fugsam sein wirdet, doch also was gewinnung davon gevallen wirdet, daz si die zu der stat gepaw und gemainem nucz anlegen und prawhen, und auch uncz an unser widerruffen ungeverleich. Mit urkunt des briefs geben zu Wienn an suntag vor sant Jorgen tag nach Kristi gepurde vierczehenhundert iar und darnach in dem sechsunddreyssigisten iare. d(ominus) d(ux) in cons(ilio)