Wir Fridreich, von gots gnaden rómischer kúnig, zu allen zeiten merer des reichs, hertzog ze Ósterreich, ze Steir, ze Kernden und ze Krain, grave ze Tirol etc. bekennen fúr uns, unsern lieben vettern kunig Lasslawen, des vormund wir sein, und sein erben, als unser getrewr Andre Peck, spitalmaister des spitals zu Zwetl, von unsern getrewn Hainreichen und Wolfgangen, geprúdern den Ratten von Frankenrewt¹, zway tail zehents gróssen und klain zú veld und zú dorf auf vierczehen lehen und czwain hofsteten daselbs zú Frankenrewt gelegen unserr lehenschafft unsers fúrstentumbs Ósterreich zu dem egenanten spital zú Zwetl gekauft und uns ain aufgabbrief derselben geprúder fúrbracht und uns darauf diemúticleich gepeten hat, daz wír dieselben tail zehents zu dem bemelten spital génedigkleich gerúchten zú aygen. Das haben wir getan und haben dieselben tail zehents zú dem obgenanten spital als herr und lanndsfúrst in Ósterreich und vormund des benanten unsers vettern kúnig Lasslawes von súndern gnaden geáygent und aygen auch wissentleich mit dem brief, was wir zu recht daran aygen súllen und múgen in sólher mass, daz der obgemelt spitalmaister oder wer ye zú zeiten spitalmaister desselben spitals zú Zwetl sein wirdet, die obgenanten tail zehents mit irer zúgehórung von desselben spitals wegen innhaben, núczen und niessen und damit mit verkauffen, verseczen und in ander weg hanndeln und tún sol und mag als mit andern desselben spitals aygen gútern und als aygens gúts und lannds recht ist an ménicleichs írrung und hindernúss, doch ob si die obgemelten tail zehents verkauffen oder verkúmern wúrden, so sullen die, an die die egenanten tail zehents also kómen, dieselben tail zehents widerumb von uns unserm egenanten vettern kúnig Lasslawen und seinen erben zú lehen enphahen ungevérleich. Das maynen wir ernstleich. Mit úrkund des briefs, geben zú Wienn, an suntag nach Sand Elspeten tag nach Kristi gepúrd im vierzehundert und sechsundvierczigisten iar unsers reichs im sibenden iar.||
||
Commissio domini regis propria.