Wir der rat und di purger gemaine der stat datz Zwetel veriehen und tun chunt offenlich an dism prief, daz di erbern leut, di hernach geschriben stend, sich verpunden habent mit irem gutleichen willen, daz si alle iar ze den tagen, di hernach geschriben sind, ze der tagmess, di alle tag gesprochen schol werden dez morgens frue datz unser vrown chirichen in der stat datz Zwetel, dienen sullen dem erbern herren hern Niclan unserm pharrer ze den zeiten und allen seinen nachchomen di gult, di hernach geschriben sind: Dez ersten schol der erber herr her Hertweig, der pharrer von Espeinsdorf¹, dienen alle iar zbai phunt phenig, di schol unser pharrer haben auf seinem weingarten, den er hat ze Neunpeunt oder den ze Chotmansperg, und darzu hat er gegeben unserm pharrer und allen seinen nachchomen zben weingarten, di er haben sol alle iar fuer vier phunt geltes, der ain ist gelegen ze Leubs² am Stainhaus, der ander an dem Cheu(er)perg. So hat sich verpunden darzu ze dienn Nycla Freitel alle iar ain phunt gelts, daz man haben sol auf seiner wis, di gelegen ist datz Zwetl under dem Galgenpuchel. So sol dienen alle iar Hainr(ich) under den Tischen ain halbes phunt gelts, daz sol man haben auf zbain pratpenchen, di gelegen sind in der stat datz Zwetl. So schol dienn alle iar der iung Wisint ain phunt phenig, daz sol man haben auf seinen weingarten, den er hat ze Leubs und der gelegen ist am Stainhaus zenachst dem Luzzlein, der da unsers pharrer ist. So schol alle iar dienn Ians Englinn sun ain phunt phenig, daz sol man haben auf der Praitten pei der Eben var dem pharrhof. So hat der pharrer andrew urchund fur zbai phunt geltes. Darzu gelub wier alle mit unsern trewn, daz wier ze dem vorgenanten gelt noch chauffen sullen, wo wier ez vail vinden, ain phunt gelts, daz di selb mess gewinnet mit weingarten und mit allem gult, daz da vor geschriben ist, drewzehenthalb phunt gelts, daz ein igleicher dem pharrer und alle seinen nachchomen dienn sol halbes an Sand Goergen tag und halbes an Sand Michels tag, und wer dez nicht tut, den sol der pharrer oder sein anwalt noetten und phentten paidew umb den vorgenanten dienst und umb daz wandel, alz auf purchrecht recht ist, und wer im iemant dez wider, so schulle wier im sein geholffen sein, daz gelub wier im mit unsern trewn. Chaufft aber der vorgenanten ainer sein gelt, da er var umb geschriben ist, auf einem andern erib, da ez gelegen ist, nach dez pharrer und der erbern purger rat, da schol ez der pharrer von nemmen und sullen daz phant ledig lazzen, da daz selb gelt vor auf verschriben ist. Ez sol auch der pharrer dem chappelan, der di selb mess spricht, geben alle iar vier phunt phenig und di pfrunt, und waz furbaz ze der mess geschafft wiert, da sol der pharrer dem chappelan den vierden phenig von geben. Daz daz allez stet beleib, geb wier hern Niclan unserm pharrer und allen seinen nachchomen den prief ze einem waren urchund, der versigelt ist mit der stat anhangundem insigel datz Zwetel, der gegeben ist nach Christi gepurd drewzehen hundert iar und darnach in dem zwai und funfczkisten iar an Sand Larenczen tag.