Ich Hartneid von Púchaim, oberster erbdrúgsass in Osterreich, bechenn fúr mich und all mein erben und nachkomen offenlich mit dem brief, als der wolgeboren herr herr Wilhalm von Puchaim, oberster drúgsass in Osterreich, mein lieber vetter sáliger, das haws zu Zwetel, genandt das hernnháws, so den namen und herrnn von Púchaim zuegehort und freyes aigen ist, mitsambt aller seiner zuegehorúng recht und redlich verkaufft und zu kauffen geben hate umb ein suma gelts, der ich obgenanter Hartneid von Púchaim etc. zu rechter zeit und an allen schaden gancz endtrichtt und bezallt bin, den ersamen weisen richter, rate und gemainer stat zu Zwetel und allen irnn nachkómen. Darauf sollen und múgen sew nún fúrbaser, die egewelten burger zu Zwetel und all ir nachkomen, mit dem egemelten haws und seiner zuegehorúng allen irn nútz und frúmen domit betrachten mit verkauffen, versetzen, schaffen, machen und gebm, wem sy wellenn, an mein, aller meiner erben und nachkomen und mánnigklich von únnsren wegen irrúng, hindernúss und an alles widersprechen angeverde. Ich obgenanter Hartneid von Púchaim etc. mitsambt allen meinen erben und nachkomen sein auch des obgenanten háwss mitsambt aller seiner zuegehorúng der vorbestimbten richter, rat und gemainer stat zu Zwetl und allen irnn nachkomen recht gweren, fúrstand und scherm fur all rechtlich ansprach, als solhes kauffs, freyes aigns und des lanndts in Osterreich recht ist. Gienng in aber daran icht abe oder erstúenden in icht krieg oder ansprach darinn auf mit recht, von wem das ungeverlichen wáre, des sew oder ir nachkomen zú schaden kamen, dieselben scháden, krieg oder ansprach all gelob ich in gánczlich auszurichten, widerlegen und auch widerzucheren an all ir múe, scheden und an alle widerred, und sy súllen und múgen auch das alles haben und bekomen zu mir und allen meinen erben und nachkomen unverschaidnlichn und darzue auf allem unnsren guet, erb, anligúnden und varúnden guet, das wir allenthalbem inner oder ausser landts inndert haben, wie es genant und wo es gelegen ist, gar nichts darinn ausgenomen. Das ist alles mein, aller meiner erben und nachkómen unwiderrueflicher gueter wille, wir sein lebentig oder tod. Und das der kauf yecz und hinfúr also stát und unzerbrochen beleibe, des zu ainer waren urchúnd gib ich obgenanter herr Hartneid von Púchaim etc. fúr mich, all mein erben und nachkomen den vorgemelten richter, rat und gemainer stat zu Zwetel und iren nachkomen den brief besiglten mit meinem anhangunden insigill, und der sach sind gezeugen durch meiner vleissigen bete willen die edelnn und vesten Ott Kirchperger von Kirchperg und Wilhalm Griessteter zú Arnndorf¹ auch mit irnn anhanguden insigillen, doch in baiden und iren erben an schaden. Geben zu Gmúnd² am montag vor Sand Pauls tag seiner becherúng nach Cristi geburde vierczehenhundert und im drewúndochczigisten iare.