Ich Petter Kramer burger zu Zwetl bechenn und thue kund offennlich mit dem brieff allenn und yeglichenn, denn er furkumbt, verlesenn oder geczaigt wirdet, daz ich nun bedacht hab und zu hercznn genomen, dem mennschnn nichts gwissers dann der tód und dem mennschen nichts unngebissers dann die stund des lebenns, daz ich mir pillich aus grosser sarigveltigkait zu herznn genomen. Wann ich aber wericht und underbeist pin, daz nách abganngkh der mennschenn umb zeitlichenn hab und guetter halbnn zwischnn denn fronndtnn offt und digk zwitracht und krieg auferbáchsenn und erstenn, dem ich aber in czeit meines lebenns, sovil des an mir ist und die notdurfft ervodert, gar und gannczlich furczukomen, darumb so háb ich mit guetem freyem willen und wolbedachtem mut, mein und Barbara meiner elichenn liebenn hausfrawn auch mit vleissiger betrachtung zu denn zeittenn und tágnn, alls ich daz des alters, der vernufft und aller notdurft halbnn meins leibs und gemuets wol gethain, zu kirichenn und zu strassnn wanndln und geenn mócht in aller pessten mass, weis, furm, maynung und rechtnn, wie daz yecz und hernach an aller stát vor allenn und yeglichenn geustlichenn und weltlichenn lewtenn, richternn und gerichtenn krafft und macht hat, habenn sol und mag fur menigkhlichs annsprechenn, alle und yegliche mein anligund und vorund hab und gut, so mir got der herr hie auf erdenn verlichenn und sovil ich der nach meinem tod und abganngkh hinder mein verlass, nichts darin ausgenomen, ain testamenndt, lesstenn willenn, ornung aines gescháffts furgenomen und gethann, georndt und gemácht hab, auch daz gethann mit rechter gwissnn wissenntlich in krafft diczs brieffs auff fuerm und maynung, wie dann von wort zw wortnn hernach stet, und namlich zum ersten: also wann geschiecht, das ich mit tód verganngen und nicht mer in lebenn pin, daz ich gotlicher parmherczigkait diemuetig bevelhund sein will, daz zu voran vonn der zeitlichenn hab, sovil ich der hinder mein verlass, mein leichnam ersamlich alls annder mier genáss zu der erdnn bestátt mit begrebnuss, swbnntn und dreyssigistnn lóblich, alls sich beczimbt, furgesechenn werde; item so verornn und schaff ich meiner fronntschafft auff meiner seitten von allem meinem gut zu gebenn zwainczigkh phundt phening, soverr sy daz ersuechen, und nicht mer; soverr sy daz aber nit ersuechtnn, so sol man die zechenn phunt phening raichen und gebenn in die schuesterczech und die anndern zechenn phundt phening in der pegkhennknecht zech; item so veron [!] und schaff ich zu Sand Johanns auff dem perg hie zu Zwetl¹ funffczehenn phunt phening; item zu unnser Frawn kirichen in der stat² funffczehenn phunt phening, item in daz spital zu dem lieben Sand Mertn³ funffczehenn phunt phening; item in Schonnpach⁴ zehenn phunt phening; item gan Phaffennslag⁵ zehenn phunt pheníng; item zu Sannd Ulreich funff phunt phening; item zu Sand Thaman im Daxsgrabnn⁶ funff phunt phening; item zu Sand Tybolt gann Friderspach⁷ funff phening; item zu Sand Liennhart zum Gotfridts⁸ funff phunt phening; item denn Parfuessnn pruedernn gan Lews⁹ funffundczwainczigkh phunt phening; item denn Innernnbruedernn [!] gan Stain¹⁰ funffundczwainczigkh phunt phening; item denn Predigernn gan Krembs in daz kloster¹¹ zwainizigkh phunt phening; item gan Sand Petter zu Veldnn funff phunt phening; item zu unnser Frawn in daz Pirach funff phunt phening; item zu unser Frawn gain Ráfás¹² funff phunt phening; item gain Varbeis vier phunt phening; item in daz kloster gan Lyncz¹³ funff phunt phening; item in daz kloster gann Welss¹⁴ funff phunt phening; item in daz kloster gan Steir¹⁵, daz in der stat ligt, funff phunt phening; item in daz kloster gann Ens¹⁶ funff phunt phening. Item so verornn und schaff ich in die schuesterczech hie zu Zwetl hundert und zwainczigkh phundt phening, davon sol man mir iarlich ain iartag haltenn mit dem grossen opher und mit aynner lamphnn, darin sol prinenn aynn ewigs liecht tág und nácht; item so schaff ich zu ainer Romfart zwainczigkh phunt phening; item zu ainer Achfart zehenn phunt phening; item zu Sand Graynn funff phunt phening; item zu Sand Wolfganng gan Gnándlastorff funff phunt d.; item auf den Súntagperg¹⁷ funff phunt phening; item zu Sannd Atili¹⁸ funff phunt phening; item in daz kloster zum Wudbeis¹⁹ vier phunt phening; item zu Sand Thoman oberhalb des walds²⁰ funff phunt phening; item zu Allenn Heyling²¹ funff phunt phening; item gan Kunigswisn²² zehenn phunt phening; item gan Eysger²³ funff phunt phening; item gan Harmanslag²⁴ funff phunt phening; item zu Sand Sebastian bey Krembs zehenn phunt phening; item zu Sand Margreten gan Suessenpach²⁵ funff phunt phening; item denn armen lewtnn umb ain wollens tuech funff phunt phening; item zu Sand Wolfgang im Pirig²⁶ vier phunt phening; item zu unnser lieben Frawn gan Ótting²⁷ vier phunt phening; item zu unnser Frawn gan Kostlarn vier phunt phening; item zu Sand Lienhart, do der Eysnhauffen ligt, vier phunt phening; item zu Unnserm Herrn gan Passaw²⁸ vier phunt phening; item funff armen ellennden iunkhfrawn, die nit versechen, denn sol man gebenn yeder zu heyratgut, die frum sein, funff phunt phening; item zum Heyling Pluet²⁹ drew phunt phening; item zum paw gann Passaw zwaye phunt phening; item in die schuechknechtczech sechs phunt phening; item denn Parfuessnn bruedernn gann Egnnburgkh³⁰ sechs phunt phening. Die ubermass all meins gelassen guets verorn und schaff ich Barbara, meiner elichenn liebenn hausfrawn, in solher maynung, daz sy unnser bayder kinnder davon erberlich versechenn sol; wár aber, daz die bemelt Barbara auch mit tod an geschefft verschied und abgienng ee dann die gemeltnn unnser baider kinder, oder daz unnser baider kinnder auch verschiednn an leiberibnn, so sol das selb unnser bayder gelassen gut allennthalbnn nindert annderswo hingevallnn, dann halbertail in die schuesterczech hie zu Zwet(e)l und der annder halb tail in der pegkhennknecht zech daselbs, doch in solhem meinem geschafft halt ich mir bevor, daz ich daz selbig furann wider mag an mich nemen, daz mindernn oder mernn, endern gár oder ains tails abthun mug, wie und wann ich wil, bey gesundtm leib, in meinem siechtumb oder todpet. Darumb und daz alles zu warer vestenn urkund so hab ich disen brieff aufrichten und machen lassen, besigelt mit meinem aigen anhanngundn insigl. Des sind geczeug der edl vest und gestreng ritter herr Wolfganng Kirichperger zu Kirichperkh und der edl Paull Wasserberger von Gruennpach³¹ aigen insigill, die sy umb meiner vleissigenn gebet willenn, inn und irnn erbenn an schadenn, darann gehanngen haben, darunder ich mich mit meinen tron und ernn verpint, stét ze halten, was vorstét, meiner gebet umb die insigl und dicz meins testamencz, lestenn willens, ordnung und geschafft sind gehanngn. Geben in der stat Zwétl nach Cristi geburd tausent vierhundert und in dem funffundnonczigisten iar am ertag nach des heylingkrucztag im heribst.